Сунтаарга 40 оҕо үтүө көмөһүттэр кэккэлэригэр киирдэ

Аҕа дойдуну көмүскээччилэр дьиэ кэргэттэрин кэмитиэтин ыйан-кэрдэн биэрээччитэ Жанна Макарова көҕүлээһининэн, «КСВО — ДЕТИ» волонтерскай хамсааһын үлэтин саҕалаата.

Бастакы күн бэйэ-бэйэлэрин кытта билсэн, араас оонньуулары оонньоон доҕордоһуу сыһыаны олохтоотулар. Инникитин араас көмөнү оҥорууга бэлэмнэрин биллэрдилэр.

Волонтердар этэрээттэрэ «Партизан» норуот айымньытын театральнай киинин иһинэн үлэлиэҕэ. Кырдьаҕас дьоҥҥо көмө быһыытынан тимуровскай үлэлэри тэрийиэхтэрэ, байыаннай дьайыыга  сылдьар уолаттарга гуманитарнай көмөнү хомуйууга, бэлэмнээһиҥҥэ үлэлиэхтэрэ, араас тэрээһиннэргэ бэрээдэги көрүүгэ-истиигэ көмө буолуохтара.

«Билиҥҥи уустук кэмҥэ үтүө дьыаланы оҥоруу, чөл толкуйдаах буолуу инники күөҥҥэ тутуллар уонна дьоҥҥо-сэргэҕэ ытыктанар, биһирэнэр дьыала«, — дииллэр оҕолор. Онон инникитин, маннык улахан суолталаах үлэҕэ туруммут оҕолорго ситиһиилэри баҕарабыт!

Сунтаар улууһун дьаһалтатын пресс-сулууспата