Сунтаарга «Аҕа күрэҕэр» Корниловтар бастаатылар

Сунтаар улууһун Сиэйэ нэһилиэгэр  ыытыллыбыт «Аҕа күрэҕэ» хаһааҥҥытааҕар да элбэх кыттааччылаах буолан,  күрэх хойукка диэри бэрт тыҥааһыннаахтык барда.

Бары да кыахтаахтар, күүстээхтэр, кыайыыга дьулуурдаахтар. Ол эрээри бастыҥтан бастыҥнарынан Сиэйэлэр  муҥутуур кыайыылааҕынан таҕыстылар. Утарсааччыларын олох ырааҕынан хааллартаан, 50 тыһ.солк. уу харчынан наҕараадаланнылар уонна өрөспүүбүлүкэтээҕи күрэскэ путевканы туттулар.

Степан уонна Гром Корниловтар бу күрэххэ хаһыс да төгүлүн кытталлар. Быйыл ордук «силовой» көрүҥнэргэ куоһурдарын уураннар сыл устата бэлэмнэннилэр. Гром аҕыс оҕолоох дьиэ кэргэн улахан оҕото буолар. Онон үлэҕэ-үөрэххэ туйгун, кыайыыга дьулуура үрдүк.

КҮРЭХ КЫАЙЫЫЛААХТАРА:

Бастакы миэстэ — Степан уонна Гром Корниловтар — Сиэйэ нэһилиэгэ.

Иккис — Виктор уонна Артем Илларионовтар — Түбэй нэһилиэгэ.

Үһүс — Геннадий уонна Арылхан Пустоляковтар — Хадан нэһилиэгэ.

Бу курдук саха саарынын, тыа сирин эр дьонун быһаарар, тургутар күрэс түһүлгэтэ үтүө түмүктээх, сытыы киирсиилээх, умнуллубат түгэннэрдээх буолла.

Сунтаар улууһун дьаһалтатын пресс-сулууспата