Сунтаарга ат сүүрдүүтүгэр тыһыынчанан киһи муһунна

Сунтаарга Сергей Зверев-Кыыл Уола 125 сыллаах өрөспүүбүлүкэтээҕи ыһыаҕын иитинэн, Владимир Крыжановскай аатынан ипподромҥа ат сүүрдүүтүгэр тыһыынчанан киһи муһунна.

Урукку сылларга боруода аттар эрэ сүүрэр буоллахтарына, кэлиҥҥи кэмҥэ саха аттара эмиэ илин-кэлин түсүһэр буоллулар.

Үбүлүөйдээх сүүрүүгэ 10 хамаандаттан уопсайа   27 ат 7 дистанцияҕа сүүрдэ.

Саха боруодатын атын сүүрүүтүн тэҥэ Е.Е. Алексеев, Н.К.Ананьев, аҕа баһылык А.В.Григорьев бириистэригэр сүүрүү ыытылынна.

Улуус баһылыга Анатолий Григорьев саха атын сайыннарыыга анал бирииһин анаата. Ол курдук кыайыылаахтар 100, 75, 50 тыһыынча солк.наҕараадаланнылар. Маны таһынан Кутана ууһа таптайан оҥорбут анал бэлиэлээх батыйатын туруорда.