Сунтаарга бизон төбөтүн уҥуоҕун буллулар

Бэҕэһээ Сунтаар нэһилиэгиттэн 6 км. турар Обоччолоох карьерыттан уолаттар былыргы бизон төбөтүн уҥуоҕун буллулар.

Бэҕэһээ киэһэ түөрт чаас саҕана Степан Кардашевскай погрузчигынан буору баһан тимир көлөҕө бырахпыта улахан бэйэлээх муос көстөн кэлбит. Онуоха бииргэ үлэлиир уола Николай Алексеев тахсан сыныйан көрбүтэ, баараҕай бизон төбөтө эбит. Степан Кардашевский: «Бастаан муоһун көрүбүтүм, биһиги оҕустарбытынааҕар төһө эмэ улахан. Тиистээх, аны олус сыттаах этэ», — диир.

Былыргы олоҕу кэрэһэлиир кыылы тиэйэн «Сахабулт» салайааччытыгар харайан, тутатына Сэлии кыылы үөрэтэр Академияҕа хаартыскылаан, видеолаан ыыттылар. Анал үөрэхтээх быһа сабаҕалааһынынан истиэп бизона, историяҕа улахан суолталаах, сэдэх булумньу буолла. Научнай сотрудник Станислав Колесов этэринэн: «Маннык бизон уҥуохтарын билигин була тураллар. Кини сэлии кэминээҕи кыыл буолара биллэр. Эһиги булбут бизоҥҥут кээмэйэ орто, үчүгэйэ диэн тииһэ, төбөтүн уҥуоҕа бүтүн эбит. Салгыы чинчийэн иһиэхпит», — диэн санаатын үллэһиннэ.

Сунтаарга бу күһүн былыргы таас мастары булбуппут, аны бизон кыыл көстөн былыргыны кэпсиирэ, дьэ, дьикти!

Тускулаана ГОРОХОВА-КОБЕЛЬЯНОВА

Сэтинньи 14 күнэ, 2024 сыл.