Сунтаарга Бордоҥ бөһүөлэгэр чугас тыатааҕы сылдьарын тыллаатылар

Бөһүөлэккэ чугаһаабыт тыатааҕыны утары хайдах миэрэ ылыллыахтааҕын туһунан Сунтаар улууһугар Айылҕа харыстабылын инспекциятын салайааччыта Сергей Николаев санаатын үллэһиннэ:

«Ханнык баҕарар кыылы, ол иһигэр сиэмэхтэри, бөрө да, эһэ да буоллун, биһиги харыстыыр эбийиэктэрбит буолаллар. Ыллыҥ да бөһүөлэктэн чугастыы бултаныллыбат. Бултуурга көҥүл киһи олоҕор кырдьык кутталы үөскэппит  эрэ буоллаҕына бэриллэр. Көҥүл болдьоҕо 3 хонуктан ордубат. Холобур, дьиэ сүөһүтүн, сылгыны тардыбыт түгэнигэр, бултуурга көҥүл бэриллибэт (итини бэлиэтиир тоҕоостоох). Биллэн турар, ойуурга сылдьар дьонҥо сэрэтии үлэтэ ыытыллыахтаах. Сорох сиргэ тыаһаан-уһаан дьон олорор сириттэн тэйитии үлэтин ыыппыт түгэннэрин истэбит. Бордоҥ нэһилиэгин баһылыга Константин Уаровтыын адьырҕаттан сэрэхтээх буоларга, дьону харыстыырга сүбэлэстибит. Эһэ баар, кэлиэн сөптөөх сиригэр ас тобоҕун хаалларыллыа суохтааҕын өйдүөх тустааххыт.

Бу сырыыга тыатааҕы дьону көрөөт куоппут уонна биллибэтэх. Итинник түгэнҥэ суолун-ииһин хайаан да хаартыскаҕа түһэрэр ордук. Уопуттаах булчуттарынан бүтэйдээн, хайа диэки барарын кэтэниллиэхтээх. Эсэһит ыттарынан сырыһыннаран тыатааҕыны эмиэ тэйитиэххэ сөп». Бу туһунан Сунтаар улууһун дьаһалтатын пресс-сулууспата суруйар.