Сунтаарга былыргы ньыманан тимири уһаардылар

Сэргэй Сибиэрэп — Кыыл Уола төрөөбүтэ 125 сылыгар тимири уһаарыы төрүт ньыматын туһанан «ТИМИР УУС» лааҕырын иитиллээччилэрэ, бэйэлэрин харыларын күүһүнэн тимири уһаардылар.

Манна 20 оҕо хоно сытан түүннэри-күнүстэри үлэлээтэ. Уһуйааччы Василий Уаров «20 оҕо биир киһи курдук үлэлиирин ситистибит», — диир.

Бастаан утаа, Бүлүү эбэ кытылыттан тааһы хомуйан, оттук мастарын бэлэмнээн, чоҕу оҥорон, тимири атын эттиктэн арааран, төрүт дьарык уустугун оҕолор бэйэлэринэн биллилэр. Саамай кэрэ түгэнэ үлэ түмүгүн көрөр дииллэр.

Тимири уһаарар оһох уратылаах. Маны тутан таһаарарга ааттах тимир уустара Дабайар Уус уонна Утум Уус сүрүннээтилэр. 1400 -1500 кыраадыс итиини тулуйар оһоҕу коалиновай туойунан сыбаан таһаардылар. Оҕолор уопуттаах уустары көрөн-истэн элбэххэ үөрэннилэр.