Сунтаарга чааһынай дьиэ уонна гараас уокка былдьанна

Бэҕэһээ, бэс ыйын 1 күнүгэр, сарсыарда Сунтаар сэлиэнньэтигэр икки кыбартыыралаах дьиэ уонна гараас умайдылар. Баһаар түмүгэр 44 саастаах эр киһи эмсэҕэлээтэ. Бу туһунан СӨ гражданскай оборуонаҕа уонна нэһилиэнньэ олоҕор-дьаһаҕар куттал суоһаабатын хааччыйар министиэристибэ иһитиннэрэр.

Баһаар туһунан иһитиннэрии 10:24 чааска киирбит. Баһаарынайдар тиийбиттэригэр, гараас сууллан, уот дьиэҕэ тарҕаммыт.

Көмө суһаллык оҥоһуллубутун үрдүнэн, барыта 171 кв.м. иэннээх икки эбийиэк уокка былдьаммыт.

Баһаар төрүөттэрин, хоромньуну, буруйдаахтары быһаараллар.