Сунтаарга дьүкээбил суһумнаата

Ыам ыйын 3 күнэ үүнэр түүнүгэр, бөөлүүн, Сунтаарга дьүкээбил уота суһумнуу умайда.

Бу дьикти кэрэ көстүүнү фотограф, видеограф идэлээх Радомир Сергеев устубут.  Сунтаар сэлиэнньэтин үрдүнэн халлаан бүтүннүү күөх, араҕас уотунан суһумнуу оонньоото, дьэргэлгэннии дьиримнээтэ.

Ыам ыйыгар урут дьүкээбил көстөрө иһиллибэт этэ. Бу — магнитнай буурҕа буолбутун туоһута. Муус устар 30, ыам ыйын 1 күннэригэр Күҥҥэ улахан эстиилэр буолбуттара, ол магнитнай долгуна 2-3 күнүнэн Сиргэ кэлэр.

Учуонайдар этэллэринэн, билигин Күн актыыбынаһа үрдээн, эстиилэр элбээбиттэр. Ыйга иккитэ-үстэ магнитнай буурҕалар түһэр буоллулар. Быйылгы сыл оннук. Ол эрээри, барыта эргийэн кэлэ турарыныы, сотору намырыыр, уҕарыйар аналлаах.