Сунтаарга эр киһи быһаҕынан анньыллан балыыһаҕа киирбит

Ааспыт суукка устата Саха сиригэр 5 буруйу оҥоруу тахсыбыта бэлиэтэннэ. Бу туһунан СӨ Борокуратуурата иһитиннэрэр.

Сунтаар сэлиэнньэтигэр 1993 с.т. эр киһи быһаҕынан анньыллан балыыһаҕа киирдэ,  уорбаланааччы быһаарылынна.

Дьокуускайга Котенко уулуссаҕа баар дьиэлэртэн биирдэстэрин тиэргэнигэр мас гараас умайда. Уоту умуруоруу түмүгэр 1988 с.т. эр киһи уонна кини 2014 с.т. кыыһа балыыһаҕа киирдилэр. Быһылаан туохтан-хайдах тахсыбытын быһаарыы борокуратуура хонтуруолугар ылылынна.

Өрөспүүбүлүкэ киин куоратыгар икки уоруу тахсыбыта бэлиэтэннэ. Биир түбэлтэҕэ биллибэт дьон электроинструменнары уорбуттар, оттон иккис түбэлтэҕэ — биэнсийэлээх «инвестиция» диэн албаска киирэн, 1,7 мөл. солкуобайтан тахса харчытыттан маппыт. Ону таһынан, полиция үлэһиттэрэ Дьокуускайга наркотигы атыылыыры тохтоппуттар, оттон Мэҥэ-Хаҥалас улууһугар итирик туруктаах иккиһин уруулга олорбут суоппар тутулунна.

Суукка устата итирик туруктаах массыына уруулугар олорбут түөрт суоппар тутулунна. Киһи өлүүлээх суол быһылаана бэлиэтэммэтэ.