Сунтаарга хамаанданан «Аман өс» күрэһэ ыытылынна

Алексей Афанасьев — Сэһэн Өлөксөй аатын, аман өһүн, сахалыы саҥатын, санаатын үйэтитэр, ыччакка төрөөбүт тыл суолтатын дириҥник иҥэрэр  «Аман өс» күрэһэ быйыл уон иккис төгүлүн ыытылынна.

Өрөспүүбүлүкэҕэ бастакы бэрэсидьиэн Михаил Николаев 75 сааһыгар аналлаах «Аман өс» күрэһигэр кылаан кыайыылаах буолан дойдубар кэлэн, Сунтаарга бастакы «Аман өһү» урукку Сибиэрэп түмэлигэр (билигин Сибиэрэп УНАК оннугар баара) тэрийбиппитин бу баардыы өйдүүбүн. Ол онно ыытааччы, көҕүлээччи быһыытынан кыттыһан саҕалаан, хас сыл аайы тэрийэр буолбуппут. Бу тэрээһини Сэһэн Өлөксөй кэргэнэ Зинаида Михайловна Афанасьева ис сүрэҕиттэн кыһаллан, ыччат, култуура салалталара, Л.Попов аатынан Сунтаар киин бибилэтиэкэтэ иилээн-саҕалаан тэрийэллэр.

Былырыыҥҥа диэри биирдиилээн дьон кыттар эбит  буоллаҕына, быйыл хамаанданан «Аман өс» күрэһэ ураты буолла. Лиссиэй, кэллиэс, Сунтаар нэһилиэгин дьаһалтата, Бүлүүчээн, Дьаархан, Элгээйи, Уһун Күөл, Үөһээ Бүлүү хамаандалара кэлэн кыттыыны ыллылар. Барыта аҕыс хамаанда. Киһи кэрэхсиирэ, нэһилиэктэртэн Аҕа баһылыктар, салайааччылар санааларын сайа этиннилэр. Күрэс бастакы түһүмэҕэр хамаанданы билиһиннэриигэ Сунтаар лиссиэйэ хамаандатын олоҥхонон билиһиннэрэн дьон сэҥээриитин ылыан ылла. Хас биирдии хамаандаҕа салайааччы, аҕа саастаах, ыччат уонна оскуола үөрэнээччитэ кытынна.

Тэрээһин Сунтаар технологическай кэллиэһигэр  ыытыллар. Быйыл устудьуоннар минньигэс алаадьыларынан күндүлээн көрсүбүттэрэ олус истиҥ түгэн буолла. Үөһээ Бүлүүттэн Дьулусхан Баппаҕай Сүдү дойду уола, салайааччылара Николай Васильев — Харыйалаах Уола кэлэн тэрээһин таһымын, суолтатын үрдэттилэр. Бүлүүчээн, Уһун Күөл, Сунтаар баһылыктара тэрээһини көҕүлээбиттэригэр тустаах махтал.

Кылаан кыайыылаах Сунтаар лиссиэйэ, иккис үрдэл Үөһээ Бүлүү, үһүс үрдэл Элгээйи нэһилиэгин хамаандата буолла. Быйылгы тэрээһин кэрэхсэбилэ — урукку кэмҥэ үксүгэр баһыйар өттө кэрэ аҥар аман өскө кыттар буоллаҕына, быйылгы тэрээһиҥҥэ эр киһи сүрэ кыайа тутта.

Ыраахтан да буоллар күрэс туһунан кылгастык суруйан үйэтитиим дуу?! Уонна сүрүнэ туйахпын хатаран төрөппүт уолум Айаан аман өскө кыттыыны ылан сахалыы тылы өрө тутара бу, буоллаҕа ийэ киһиэхэ үөрүү уонна ситиһии!

Тускулаана ГОРОХОВА-КОБЕЛЬЯНОВА