Сунтаарга «Харысхал» түмсүү сүүнэ улахан хаххалыыр сиэккэни оҥордулар

Сунтаар улууһугар волонтердар «Харысхал»  түмсүүлэрэ өстөөхтөн саһар, хаххалыыр маскировочнай сиэккэни оҥорбуттара балтараа ый кэриҥэ буолла. Манна ыал ийэлэрэ, эбэлэрэ, кыыстара, сиэннэрэ бука бары кыттыыны ылаллар диэн Сунтаар улууһа ТГ-ханаал иһитиннэрэр.

Кэлин Миирнэй волонтердарын кытта бииргэ үлэлэһэн, кинилэр сакаастарынан 17 миэтэрэ уһуннаах, 10 миэтэрэ кэтиттээх тиэхиньикэни бүрүйэр сиэккэни өрөн таһаардылар. Мантан салгыы эбии иккини оҥоруохтаахтар. Сорох оҥорбут сиэккэлэрин Сунтаар улууһун баһылыга Анатолий Григорьев номнуо миэстэтигэр тиэрдибит. Уолаттар «олус наадалаах, тыын суолталаах» диэн улаханнык махтанналлар. Онон маннык көдьүүстээх үлэни ыытар дьоммут, өссө кынаттанан, киэн далааһыннаахтык үлэлииргэ бэлэмнэр.

Волонтердар ыстаабка билигин нэһилиэнньэттэн көмө быһыытынан сылаас таҥаһы, наадалаах малы-салы туталлар. Ону сэргэ, алдьаммыт төлөппүөн, көмпүүтэр, принтер курдук тиэхиньикэ араас көрүҥүн тиэрдиэххитин сөп диэн иһитиннэрэллэр. Туттарыллыбыт малы-салы Мииринэйгэ ыыталлар. Онтон наадалаах микросхемаларын ылан дроннары өрөмүөннүүргэ миэстэтигэр тириэрдэллэр эбит.