Сунтаарга икки киһини өлөрүү тула силиэстийэ үлэлиир

Олунньу 24 күнэ үүнэ түүнүгэр Сунтаар улууһун Кутана сэлиэнньэтигэр икки киһини төбөҕө охсон өлөрбүттэрэ биллибитэ. Бу ыар быһылааҥҥа уорбаланар 35 саастаах киһини туппуттар диэн СӨ Силисэтийэлиир кэмитиэтэ иһитиннэрэр.

34 саастаах эр киһи уонна 64 саастаах дьахтар криминальнай быһыылаахтык өлөрүллэн сыталларын чааһынай дьиэлэртэн булбуттара.

Силиэстийэ дааннайдарынан, олунньу 24 күнэ үүнэ түүнүгэр эр дьон арыгы иһэн баран этиспиттэр. Ол түмүгэр 35 саастаах киһи аннараа киһини тимир ломунан төбөҕө саайталаабыт. Эр киһи тута тыына быстыбыт.

Ол кэнниттэн өлөрүүгэ уорбаланар киһи саастаах дьахтар олорор дьиэтигэр тиийбит. Урукку өстөһүүнү иэстэһэр санааттан дьахтары төбөҕө сүгэнэн саайбыт уонна дьиэтин уоттуу сатаабыт.

Полиция үлэһиттэрэ бу киһини ыаллыы сытар дэриэбинэттэн туппуттар. Билигин бу холуобунай дьыала тула силиэстийэ ыытыллар.