Сунтаарга Ил Түмэн депутаттара үлэлээтилэр

Сунтаар улууһа киинтэн тэйиччи сытар буолан, кыһалҕа элбэх.  Ил Түмэн бэрэссэдээтэлэ Алексей Еремеев салайааччылаах бөлөҕү кытта мунньахха улууһу сайыннарыыга, нэһилиэнньэ олоҕун тупсарыыга туһуламмыт элбэх ыйытыы турда.

Ол курдук, НДПИ-тан саҕалаан мэлдьи кыаллыбат ыт боппуруоһугар тиийэ, хайдах дьаһаныахха сөбүй диэн долгутуулаах боппуруостары, дьаһалта сүрүннүүр үлэһиттэрэ, нэһилиэктэр баһылыктара уонна улуус депутаттара туруорустулар.

Ил Түмэн депутаттара икки күн устата улуус бөдөҥ нэһилиэктэригэр Тойбохойго, Элгээйигэ уонна Сунтаарга үлэлээтилэр. Быстах хомуурга барбыт байыас дьиэ кэргэнигэр сылдьан, хайдах олороллорун көрдүлэр, туох кыһалҕалар баалларын ыйыталастылар. Тойбохойдооҕу оҕо дьиэтигэр сылдьан, иитиллээччилэргэ таҥаһынан-сабынан көмөлөстүлэр. Ону тэҥэ, Тойбохойго комбикормовай собуот арыллыытыгар кыттыыны ыллылар.

Бүгүҥҥү күҥҥэ хаарбах туруктаах турар, саҥардыллыыга эрэйиллэр социальнай эбийиэктэри көрдүлэр, туох-ханнык үлэ барыахтааҕын билистилэр.
Сунтаарга больничнай комплекс 2-с уочаратын тутуута хаһыс да сылын салгыҥҥа ыйанан турар. Маннык балаһыанньалаах библиотечнай ситим эйгэтигэр Л.Попов аатынан улуустааҕы киин библиотека дьиэтэ, көтөр аал балаһатын аныгы ирдэбилгэ эппиэттиир гына саҥардыы үлэтэ, Кэмпэндээйигэ оскуола-саад, «Сир уустара» оҕо сынньанар лааҕырыгар эбии  комплексы тутуута, олорор дьиэлэри гаастааһын курдук улэлэр билигин анал бырайыактара оҥоһуллан бэлэм турар. Ол эрээри, ханнык да бырагыраамаҕа ситэ киирбэккэ, өрөспүүбүлүкэҕэ чугастааҕы былааныгар суох.

Улуус устуоруйатын билиһиннэрэр Тойбохойдооҕу уонна Элгээйитээҕи кыраайы үөрэтэр мусуойдар дьиэлэрэ урукку тутуулар. Билигин хаарбах туруктаах буоланнар сыаналаах экспонаттар эргэрэр  чинчилээхтэр.

Маны таһынан, Аҕа дойду сэриитин кыттыылааҕа Егор Петровка Дьоруой аатын иҥэрии, С.Зверев-Кыыл Уолун аатынан норуот уус-уран айымньытыгар анал бириэмийэни олохтооһун,  тулаайахтары дьиэнэн хааччыйыы кээмэйин улаатыннарыыга этиилэр киирдилэр.

Төһө да туруорсуллар, кыаллыбакка турар боппуруостар элбэхтэрин иһин, кэнники сылларга Сунтаар улууһа сайдыы суолун батыһан, үгүс үлэ барар. Ол курдук  өрөспүүбүлүкэтээҕи, федеральнай бырагыраамаларга киирсэн элбэх социальнай эбийиэктэр, олорор дьиэлэр тутуллаллар.

Бырамыысыланнаска, суолу-ииһи тупсарыыга, тыа хаһаайыстыбатыгар өйөбүл мэлдьи баар. Сыл ахсын өрөспүүбүлүкэҕэ федеральнай бүддьүөттэн 46 млрд солк.бэриллэн араас эйгэҕэ туһаныллар.

Сунтаар улууһун дьаһалтатын пресс-сулууспата