Кинигэ биһирэмин култуура салалтатын информационнай-методическай салаатын сэбиэдиссэйэ Галина Самойлова истиҥник-иһирэхтик иилээн ыытта, библиографическай ырытыытын Киин бибилэтиэкэ библиография уонна кыраайы үөрэтэр салаатын сэбиэдиссэйэ Мария Иванова билиһиннэрдэ, Владимир Иванович бэйэтин суруйууларын, итиэннэ кини туһунан суруйуулардаах кинигэлэр, сурунааллар, хаһыаттар “Үтүө киһи, үтүөкэн үлэһит” диэн ааттаах быыстапканы уонна дайджеһы библиограф Лидия Чирикова оҥордо. Владимир Иванович атын улууска үлэлии сырыттаҕына, дойдугар кэлэн, төрөөбүт улууһуҥ сайдыытыгар үлэлэс диэн ыҥыран, билигин да дойдутугар таһаарыылаахтык үлэлии сылдьар Сунтаарбыт Аҕа баһылыга Анатолий Григорьев бииргэ үлэлээбит сылларын ахтан-санаан ааста, киниэхэ уонна хомуйан оҥорооччу Наталья Владимировнаҕа махталын, эҕэрдэтин тиэртэ.
Кинигэ ис тутула 8 түһүмэхтэн турар. Ахтыы-биһирэм ол быһыытынан тэтимин быспакка айаннатта. Ол курдук, кинигэбит дьоруойа Владимир Иванович төрөөбүт-үөскээбит Уһун Күөлүгэр оонньообут оҕо сааһыттан бииргэ улааппыт үөлээннээхтэрэ, билиигэ-көрүүгэ сирдээбит учууталлара, умнуллубат устудьуон сылларын атаарбыт эдэр сааһын куоратыгар – Хабаровскайга бииргэ устудьуоннаабыт доҕотторо, Мэҥэ Хаҥаласка үлэлээбит сылларыттан, төрөөбүт дойдутугар эргиллэн, үөрэҕирии салалтатын салйааччытынан, улуус аҕа баһылыгынан үлэлээбит кэмнэриттэн, өрөспүүбүлүкэ салайар дуөһунастарыгар – култуура уонна үөрэҕирии министиэристибэтигэр – үлэлээбит-хамнаабыт кэмнэриттэн уонна билигин салайан олорор Жатайдааҕы техникумуттан бииргэ алтыспыт, үлэлиир дьон, итиэннэ тапталлаах кэргэнэ, сылаас холумтаннаах тыыла Альбина Вадимовна, бииргэ төрөөбүттэрэ, аймахтара истиҥник саныыр ахтыыларын сорох видеонан, сорох илэ кэлэн санаан аастылар, эҕэрдэлэрин эттилэр.
Кинигэ толкуйданан, олоххо киирэрэ бэйэтэ ураты, бэл диэтэр, кинигэ таһынааҕы хаартыската булуллара кытта бэйэтэ туспа устуоруйалааҕын мэлдьи күүтэр-кэтэһэр күндү киһибит Наталья Владимировна-Сайа кэпсээтэ. «Элбэх ахтыы кинигэтин бэрийбитим, таһаарбытым, аахпытым да, салайааччы киһини элбэхтэ кэрэмэс киһи», — дииллэрин мээнэ истээччим-көрөөччүм суох диэн эттэ. Үлэһит киһини ханна, ханнык да дуоһунаска олорпуттарын иһин, кинини мэлдьи сайыһа, аһыйа, алгыы хаалаллар эбит диэн ахтыылары аахтахха билэҕин. Кинигэни кытта билсибит, аахпыт дьон аатын сөбүлээбиттэрин, умнулла быһыытыйбыт саха тыла Владимир Ивановичка, кырдьык да, уот харахха барсарын, биһирээбиттэрин билиннилэр.
Үгүс ыалдьыт Владимир Иванович тапталлаах төрөппүттэрин ийэтэ Федора Павловнаны, аҕата Иван Герасимович үтүөкэннээх дьон буолан, үтүө киһи, үтүөкэннээх үлэһит улааппыт, үүммүт эбит диэн санааларын үллэһиннилэр. Үлэни таптыырга, эппиэтинэстээх буоларга оҕолорун отой кыраларыттан ииппиттэрэ-такайбыттара кинигэҕэ киирбит ахтыыларга арылхайдык суруллубут.
“Киһи киэнэ кэрэмэһэ” кинигэни номнуо аахпыт ааҕааччылар бу боростуой ахтыы кинигэ эрэ буолбакка, эдэр салайааччыларга айымньылаах үлэлэригэр, эдэр төрөппүттэргэ оҕону иитиигэ бэлэм сүбэ-кинигэ, остуол кинигэтэ буолар энциклопедия да буолар кыахтаах кинигэни биир дойдулаахпыт Сайа чочуйан, күн сирин көрдөрбүт эбит диэн сыаналаатылар.
Номнуо бэйэтин ааҕааччытын булбут саҥа кинигэни бибилэтиэкэттэн уларсан ааҕыҥ, сэргээҥ диэн ыҥырабыт.
Марианна ПОСКАЧИНА, Сунтаардааҕы киин бибилэтиэкэ үлэһитэ