Сунтаарга култуура-успуорт комплексын үлэҕэ киллэрдилэр

Сунтаар сэлиэнньэтигэр Абаҕа түөлбэҕэ «Мин Сахам сирэ XXI үйэҕэ» өрөспүүбүлүкэтээҕи үтүө хамсааһын уонна «Тыа сирин кэлимник сайыннарыы» бырагыраама иитинэн култуура-успуорт комплека тутуллан үлэҕэ киирдэ.

Уопсайа 760 кв.м. иэннээх икки мэндиэмэннээх дьиэҕэ олохтоох нэһилиэнньэ физкултууранан, успуордунан дьарыктанарыгар усулуобуйа толору тэриллибит. Бастакы мэндиэмэҥҥэ дэгиттэр дьарыктанар саала, иккискэ — таҥас уларыттар сир, дьарыктанар саала бааллар.

Өрөспүүбүлүкэҕэ уопсайа 1918 спортивнай тутуу баар. 2024 сылга «Успуорт — олох нуормата» федеральнай бырагырааманан Дьокуускайга «Звезднай» түөлбэҕэ хаҥкылыыр катогу, Бүлүү улууһугар Кыһыл Сыырга успуорт саалатын тутуу түмүктэнэллэр.

Эдьигээҥҥэ «РФ Арктическай зонатын социальнай-экэнэмиичэскэй сайдыыта» судаарыстыбаннай бырагырааманан Р.М.Дмитриев аатынан элбэх хайысхалаах успуорт саалата киирбитэ. Өрөспүүбүлүкэ бырагырааматынан элбэх хайысхалаах успуорт саалата Дьокуускайга, култуура-успуорт комплекса Чурапчыга уонна успуорт комплекса Хатаска тутуллубуттара.

—Өрөспүүбүлүкэҕэ 2018 сылтан барыта 50 бөдөҥ спортивнай эбийиэк тутулунна. Бу сөтүөлүүр бассейнтан саҕалаан адаптивнай успуорт саалатыгар тиийэ. Биллэн турар, бу дьону улаханнык көҕүлүүр. Ол курдук, бу сылларга физкултууранан дьарыктанар дьон ахсаана балтараа төгүл улаатта. Бүгүҥҥү күнү көрдөххө, бу өрөспүүбүлүкэ хас иккис олохтооҕо дьарыктанарын кэриэтэ буолар, — диэн Ил Дархан Айсен Николаев парламеҥҥа туһаайан Анал этиитигэр бэлиэтээбитэ.

СӨ Ил Дарханын уонна Бырабыыталыстыбатын пресс-сулууспата

Хаартыскалар: sakha.gov.ru ылылыннылар