Сунтаарга Матрена Иванова ураты хартыыналарын быыстапката

Айылҕаттан айдарыылаах, ураты талааннаах дьон айар үлэлэрин көрдөрөр, сырдатар санаалаах араас быыстапканы тэрийэллэр. Сунтаарга Сибиэрэп түмэлигэр Матрена Иванова «Орто дойду олоҕум дьиктитин уруһуйун дьүһүйүүтэ» диэн быыстапка тэрийдэ.

Матрена Захаровна бэйэтэ доруобуйа харыстабылын үлэһитэ. Кини сааһыран баран, Сайыына «Үрүччэ» түмсүүтүттэн саҕыллан уруһуйдаан барбыт. Аны уруһуйа барыта да этиттэриилээхтэр, ураты көрүүлээхтэр. Аҥаардас «Удаҕан» диэн хартыынатын сэһэнэ ураты. Кини бу хартыыналарын сороҕун түүлүгэр ойуулаан көрөр эбит, арыт ардыгар туох эрэ ураты иэйиигэ ыллардаҕына, өрө көтөҕүлүннэҕинэ тахсан кэлэллэр эбит. Матренаны кытта чугастык алтыһар дьон бэйэлэригэр  алгыс ылар сыаллаах уруһуйдаталларын истэн сэҥээрдим. Кырдьык уруһуйдьут хас биирдии хартыыната эмтиир аналлаах курдуктар…

Быыстапка бу ый бүтэһигэр диэри бар дьон көрүүтүгэр туруоҕа, көрүөн баҕалаахтар Сибиэрэп түмэлигэр кэлиҥ!

Тускулаана ГОРОХОВА-КОБЕЛЬЯНОВА