Сунтаарга «Оҕолор, болҕойуҥ!» диэн аахсыйа ыытылынна

Оскуола оҕолоругар номнуо саҥа үөрэх дьыла  саҕаланна. Онон, суолга-иискэ сэрэхтээх буоларга болҕомтону ууруу күүһүрдэ. Сунтаарга ГАИ көҕүлээһининэн оҕолору олордор оптуобустарга сэрэхтээх буоларга ыҥырар автопробег тэрилиннэ.

Көрдөххө, Сунтаар устун оҕолорго аналлаах араҕас оптуобустар төттөрү-таары сүүрэллэр. Нэһилиэктэртэн учууталлар, үөрэх эйгэтин үлэһиттэрэ атырдьах ыйынааҕы мунньахха киирбиттэр. Бу түгэни мүччү туппакка ГАИ үлэһиттэрэ «Оҕолор, болҕойуҥ!» диэн аахсыйа тэрийдилэр.

Бастаан оскуола оптуобустарын суоппардара бары биир сиргэ түмсэн ГАИ ирдиир үлэтин сырдатар сүбэ-соргу иһиттилэр. Бу кэннэ кэккэлэһэ ааһан иһэр дьоҥҥо сэрэтэр, билиһиннэрэр сыаллаах рациянан саҥара-саҥара тимир көлөлөр Сунтаар устун айан туттулар.

Тускулаана ГОРОХОВА-КОБЕЛЬЯНОВА