Сунтаарга оскуолаҕа баран иһэн сүппүт оҕону буллулар

Сунтаарга оскуолаҕа баран иһэн сүппүт оҕону буллулар. Бу туһунан СӨ Быыһыыр сулууспата иһитиннэрдэ.

Бүгүн, сэтинньи  20 күнүгэр, СӨ Быыһыыр сулууспатыгар ЕДДС дьуһуурунайыттан Сунтаар сэлиэнньэтигэр 2012 сыллаах төрүөх оҕо сүппүтүн туһунан иһитиннэрии киирбит.
Ийэтэ кэпсээбитинэн, оҕо дьиэтиттэн тахсан оскуолатыгар барбыт. Ол гынан баран тиийиэхтээх сиригэр тиийбэтэх. Сотору буолан баран оҕо ийэтигэр сибээскэ тахсан муммутун туһунан эппит.

Оҕону көрдөөһүҥҥэ полиция 16 үлэһитэ, баһаарынай сулууспа 10 сотруднига, 45 волонтер сылдьыбыттар.  Уолчааны биир чааһынан дьиэтиттэн 4 килэмиэтирдээх сиргэ булбуттар диэн Быыһыыр сулууспа быыһааччыта  Марк Потапов иһитиннэрдэ.

Уол туруга этэҥҥэ. Ол гынан баран доруобуйатын туругун чинчийэ киин балыыһаҕа аҕаллылар.