Сунтаарга полиция буолуон баҕалаахтарга туһалаах тэрээһин ыытылынна

Сунтаар сэлиэнньэтин Албан аат Болуоссатыгар Ис дьыала отдела Уопсастыбаннай сүбэтин кытта «Ориентир-2024» диэн полиция үлэтин билиһиннэрэр тэрээһини ыытта.

Оҕолор, ыччат полиция үлэтин билсээри «Албан аат» болуоссатыгар түмүстүлэр. Полиция туттар тэрилин кытта, тимир көлө арааһа кэккэлэһэ тураннар, бэйэтэ улахан быыстапка буолла.

Тэрээһиҥҥэ сокуон тула үлэлиир идэ туһунан сырдатыы, ПДН, ГАИ үлэһиттэрэ оҕолорго оонньуу арааһын тэрийдилэр. Үлэҕэ саҥа киирбит үлэһиттэри билиһиннэрдилэр.

Түөкүннэртэн сэрэхтээх буолуу, суол быраабылатын, ПДН үлэтин туһунан сүбэлэри иһиттибит. Ону кытта хас да байыаннай дьайыы кыттыылааҕа Олег Юн хас биирдии киһи дойдуга тапталлаах буолуохтааҕын туһунан кэпсээтэ.

ТУСКУЛААНА ГОРОХОВА-КОБЕЛЬЯНОВА.