Сунтаарга саҥа култуура киинэ аһылынна

Бүгүн, ахсынньы 4 күнүгэр, Сунтаар улууһун Кириэстээх сэлиэнньэтигэр «Саргы түһүлгэтэ» култуура киинэ үөрүүлээх быһыыга-майгыга аһылынна. Эбийиэк РФ Бэрэсидьиэнэ Владимир Путин көҕүлээһининэн олоххо киирэр «Култуура» национальнай бырайыак чэрчитинэн тутулунна.

СӨ Ил Дархана Айсен Николаев саҥа киин Сунтаар улууһун култуурунай уратыларын уонна салгыы сайдар соруктарын учуоттаан тутуллубутун бэлиэтээтэ. «Саргы түһүлгэтэ» култуура киинэ – аныгылыы, сырдык, үгэстэргэ ытыктабылы уонна сэлиэнньэ кэскилигэр болҕомтону ууран тутуллубут эбийиэк», – диэн Айсен Николаев бэйэтин ТГ-ханаалыгар суруйда. Кини бу эбийиэк тутуллуута 2023 сыллаахха Арассыыйа Үлэтин Дьоруойа Владимир Африканович Михайлов дойду Бэрэсидьиэнэ Владимир Владимирович Путины кытта көрсүһүүтүгэр этиллибит көҕүлээһининэн сибээстээҕин эттэ.

«2023 сыллаахха РФ Бэрэсидьиэнэ Владимир Владимирович Путины кытта көрсүһүүтүгэр, Арассыыйа Үлэтин Дьоруойа Владимир Африканович Михайлов төрөөбүт сэлиэнньэтигэр саҥа кулууп тутуутун өйүүрүгэр көрдөспүтэ. Кини бүгүн да ыанньыксытынан үлэлиир уонна бэйэтин идэтигэр бэриниилээх үлэһит киһи холобура буолар. Бэрэсидьиэн бу көрдөһүүнү болҕомтоҕо ылбыта», – диэн Ил Дархан эттэ.

Саҥа дьиэ икки мэндиэмэннээх, уопсай иэнэ 3 тыһыынча квадратнай миэтэрэттэн тахса элбэх функциялаах комплекс буолар. Манна бибилэтиэкэ, 300 миэстэлээх көрөөччү саалата, ону тэҥэ репетициялыыр хостор бааллар. Маннык быһаарыы култуура үлэтин бары сүрүн хайысхаларын биир сиргэ түмэр, айар кэлэктииптэр үлэлииллэригэр, тэрээһиннэри, көрсүһүүлэри ыытарга киин буолар кыаҕы биэрэр. Кииҥҥэ хас да айар кэлэктиип, куруһуок үлэлиэ, тэрээһиннэр, көрсүһүүлэр уонна бэстибээллэр ыытыллыахтара. Саҥа эбийиэк уопсастыбаннай уонна култуурунай олоххо суолтатын бэлиэтээн, Айсен Николаев маннык былаһааккалар улахан наадалаахтарын эттэ.

«Саҥа кулууп оҕо саҥата иһиллэр, саҥа талааннар тахсар, үгэстэр кэлэр көлүөнэ дьыалатыгар салҕанар сирдэрэ буолуоҕа. Манна култуурунай олоҕу үөскэтэр уонна дьону түмэр бырааһынньыктар, көрсүһүүлэр уонна бэстибээллэр ыытыллыахтара. Маннык кииннэр сэлиэнньэ сүрэҕэ уонна сайдыытын бигэ тирэҕэ буолаллар», – диэн Айсен Николаев эттэ. Кини бырайыагы олоххо киллэрбит, көҕүлээбит уонна быһаарбыт дьоҥҥо махталын тириэртэ.

«РФ Бэрэсидьиэнигэр Владимир Владимирович Путиҥҥа өйөбүлүн иһин, оттон Владимир Африканович Михайловка бу суолу саҕалаабыт көҕүлээһинин уонна эрэлин иһин махтанабын», – диэн Ил Дархан түмүктээтэ.

Санатан эттэххэ, «РФ Үлэтин Дьоруойа» наҕарааданы Владимир Михайлов 2022 сыллаахха, бэс ыйын 12 күнүгэр — Арассыыйа күнүгэр ылбыта. Наҕарааданы туттарыы COVID-19 пандемиятын кэмигэр буолан, хааччахтардаах да буоллар, кини долгуйа, төрөөбүт дойдутун умнубакка, сэлиэнньэтигэр Култуура дьиэтин тутуутун боппуруоһун туруорсубута. Бэрэсидьиэн ыанньыксыт көҕүлээһинин өйөөбүтэ. Владимир Африканович 40-тан тахса сыл тыа хаһаайыстыбатын салаатыгар эҥкилэ суох үлэлиир, эдэр ыанньыксыттарга уһуйааччы.