Сунтаарга сүппүт киһи өлүгүн булбуттар

Бүгүн сарсыарда Сунтаарга сүппүт киһини көрдүү барбыт улуустааҕы хонтуруоллуур-быыһыыр пост быыһааччылара сүппүт киһи өлүгүн булбуттар.

1979  с.т. эр киһи Элгээйигэ балаҕан ыйын 2 күнүгэр түүн сүппүт. Олохтоохтор бэйэлэрин күүстэринэн көрдөөбүттэр уонна Элгээйиттэн 6 км  сиргэ, Угут Күөлгэ массыынатын уонна малын-салын булбуттар.

—Массыынаны булаат да, биһиги үс этэрээккэ арахсыбыппыт. Биир этэрээт икки оҥочонон күөлгэ көрдөөбүтэ, иккис — икки квадрокоптерынан тулатынааҕы сири-уоту көрбүтэ, үһүс этэрээт сатыы көрдөөбүтэ. Барыта 20-тэн тахса киһи сырытта.

Сотору кэминэн, быыһааччы Аман Трофимов салалталаах сатыы этэрээт сүппүт киһи өлүгүн булбута. Кини кроссовката сыппыт сириттэн ырааҕа суох сиргэ көстүбүт. Ол аата, атах таҥаһа суох сылдьыбыт. Салгыы ИДьМ үлэһиттэрэ эспэртиисэ оҥоруохтара, — диэн Сунтаардааҕы хонтуруоллуур-быыһыыр пост начаалынньыга Артем Яковлев иһитиннэрбит.