Сунтаарга “В мире культуры села” пуорум ыытылынна

Сунтаарга ахсынньы 7-8 күннэригэр “В мире культуры села” диэн тыа кулууптарын үлэһиттэрин түмэр, үлэҕэ саҥа ньымалары тарҕатар өрөспүүбүлүкэтээҕи пуорум ыытылынна.

Пуорум култуура эйгэтигэр сүҥкэн кылааты киллэрбит, новатор үлэһит С.В.Хон сырдык аатыгар ананна. Сунтаар улууһун култууратын уонна айылгытын салалтатын салайааччыта Саргылана Омукова тэрээһини үөрүүлээхтик арыйда, кыттааччыларга ситиһиини, таһаарыылаах үлэни баҕарда. Тэрээһинтэн саҥа, сонун бырайыактары күүтэрин бэлиэтээн эттэ. Тэрээһин С.В.Хон бастыҥ үөрэнээччитэ, Саха Өрөспүүбүлүкэтин култууратын үтүөлээх үлэһитэ, туйгуна,   култуура салалтатын информационнай-методическай киинин сэбиэдиссэйин Г.А.Самойлова көҕүлээһининэн ыытылынна. Форумҥа Бүлүүттэн, Ньурбаттан, Үөһээ Бүлүүттэн култуура кииннэрин салайааччылара, үлэһиттэрэ кэлэн үлэ уопут  атастастылар, билиилэрин хаҥаттылар.

“Через годы, через расстояния”  быыстапка

Форум бастакы күнэ “Через годы, через расстояния” диэн С.В.Хон олоҕун кэрчиктэрин уонна үлэтин сырдатар быыстапка үөрүүлээх аһыллыытыттан саҕаланна. Манна кэлбит ыалдьыттарга Сунтаар улууһун бибилэтиэкэлэрин кииннэммит ситимэ таһаарбыт кинигэлэрин көрдөрүүгэ туруорбуттарын кэпсээтилэр. Араас сылларга методическай сулууспа үлэһиттэрэ таһаарбыт дьоҕус кинигэлэрин уонна Сунтаардааҕы искусство оскуолатын иһинэн үлэлиир айар лаборатория туһунан кылгастык сырдаттылар. С.В.Хон араас сылларга бэчээттэппит үлэлэрин хомуурунньуктарын көрдөрүүгэ туруорбуттарын, баҕалаах дьон ылан көрдө, туһанна.

“Хоновскай ааҕыылар” кэмпириэнсийэ

Бастакытын ыытыллар кэмпириэнсийэҕэ 16 култуура эйгэтигэр ситиһиилээх, бырайыактаах култуура тэрилтэлэрин үлэһиттэрэ бэйэлэрин  уопуттарын билиһиннэрдилэр. С.В.Хону кытта чугастык алтыспыт дьон кини туһунан дьоҕус иһитиннэрии оҥордулар. Балысхан сайдыылаах кэмҥэ култуура эйгэтигэр саҥа үлэ көрүҥнэрэ, ньымалара тэтимнээхтик киирэр кэмнэригэр маннык тэрээһиннэр ыытыллаллара олус суолталаах буолла. Холобур, С.В.Хон бырайыагынан кулууп дьиэтигэр ыытыллар куруһуоктар харчы киллэрэр ньымаларын, култуура пуондатын харайыы, оҥоруу үлэтин туһунан сырдатыылара элбэх дьон болҕомтотун тарта. Ону таһынан, сиэр-туом ыытыллар ыһыах ытык тутууларын суолтатын, аныгы техниканы кулууптар күннээҕи үлэлэригэр табыгастаахтык, сөптөөхтүк туттууларын туһунан сырдатыы олус туһалаах буолла.

Форум иккис чааһа 131 №-дээх федеральнай сокуон  кулууп үлэтигэр киириитин туһунан кэпсэттилэр, ырытыстылар. Манна нэһилиэнньэ иннигэр отчуот, театральнай кэллэктииптэргэ методическэй көмө уонна тэрилтэ интернет сайтыгар тахсар иһитиннэриилэр туһунан элбэҕи эттилэр.

“Бастыҥ култуура менеджэрэ” күрэс

“Бастыҥ култуура менеджэрэ” күрэс иккис төгүлүн Сунтаарга тэрилиннэ. Күрэс хас да түһүмэхтэн турда. 15 култуура киинин үлэһиттэрэ бэйэлэрин бырайыактарын билиһиннэрдилэр. Күрэскэ Бүлүү, Үөһээ Бүлүү, Уус Алдан, Амма, Сунтаар улуустарыттан кыттыыны ыллылар. Күрэс түмүгүнэн “Бастыҥ култуура формированиетын салайааччытынан” “Партизан” НАТК хормейстерэ Виктория Мойтохонова, “Бастыҥ методиһынан” Амма нэһилиэгин Ф.Потапов аатынан КК үлэһитэ Гаянэ Петрова, “Бастыҥ уус-уран салайааччынан” Бордоҥ нэһилиэгин “Айыллаан” КК уус-уран салайааччыта Мария Спиридонова, “Бастыҥ салайааччынан” Күндэйэ нэһилиэгин “Ил” КК салайааччыта Леонид Саввинов буоллулар. Леонид Саввинов “Аҕыс кырыылаах эр бэрдэ” бырайыагын дойду таһымнаах күрэстэргэ кыттар кыахтааҕын бэлиэтээн эттилэр. Кыайыылаахтар харчынан сертификаттары туттулар.
Маны таһынан, өрөспүүбүлүкэтээҕи норуот айымньытын дьиэтин исписэлиистэрэ, култуура салалтата, нэһилиэк кулууптарын үлэһиттэрэ кыттыылаах методическэй былаһааккалар 2 күн тохтообокко үлэлээтилэр. Көрсүһүү кыттыылаахтара уонна тэрийээччилэр буолан кыттыгас бырайыак бэлэмнээн таһаардылар, кэлэр сылга бу форум Уус Алдан улууһугар ыытыллар буолла.
Киэһэлик Сунтаар улууһун кэллэктииптэрэ норуодунай ааты көмүскүүр, бигэргэтэр кэнсиэртэрэ тэрилиннэ.

Мира Афанасьева