Сунтаарга үбүлүөйдээх ыһыах ыһыллыаҕа

Сунтаар улууһугар ааспыт сылга норуот ырыаһыта, олоҥхоһут, сыанаҕа үҥкүү култууратын төрүттээччи Сергей Зверев-Кыыл Уола төрөөбүтэ 125 сылыгар аналлаах өрөспүүбүлүкэтээҕи  таһымнаах ыһыах ыытыллыбыта.  Быйыл Сунтаар улууһа төрүттэммитэ 225 сылынан, улууска Сайдыы уонна номох сылыгар анаан улахан үбүлүөйдээх ыһыах ыытыллара былааннанар.

Бүгүн улуус баһылыга Анатолий Григорьев, култуура салалтатын салайааччыта Саргылана Омукова култуура министиэристибэтигэр үлэлээтилэр. Миниистир Афанасий Ноевы уонна сүрүннүүр  исписэлиис  Светлана Эверстованы кытта быйылгы былааны торумнаатылар.

-Сэргэй Сибиэрэп аатын-суолун үйэтитэр, быйыл бэһис сылын ыытыллар «Тоҕус оһуордаах түһүлгэ» күрэһин бэс ыйын 20-21 күннэригэр ыһыах кэмигэр олохтуур курдук кэпсэттилэр Манна өрөспүүбүлүкэ араас муннугуттан фольклору, искусство араас көрүҥүн өрө туппут дьон түһүлгэлиэхтэрэ. Бүгүн Дьокуускайга «От фольклора к сценическому искусству» научнай-практическай кэмпириэнсийэ ыытыллыаҕа. Маны тэҥэ, тохсунньу 22 күнүгэр Опера уонна балет театрыгар ааспыт сылы түмүктүүр, үүммүт сылы арыйар өрөгөйдөөх түһүлгэ төрүттэниэҕэ, — диэн улуус дьаһалтатын пресс-сулууспата иһитиннэрдэ.