Сунтаарга ыһыах арыллыытыгар байыаннай дьайыы кыттыылааҕа кытынна

Сунтаар уйгулаах ыһыаҕын арыллыытыгар анал байыаннай дьайыы кыттыылааҕа Василий Спиридонов атынан көтүтэн киириитэ дьон сүргэтин көтөхтө.

Улуус Аҕа баһылыга Анатолий Григорьев ытык дуоҕаны өрө анньан бар дьонун эҕэрдэлээтэ. Сүдү киһи Сергей Зверев-Кыыл Уола төрөөбүтэ 125 сылыгар аналлаах өрөспүүбүлүкэтээҕи Үрүҥ Тунах Ыһыах саха төрүт үгэстэригэр тирэҕирэн дьоһуннаахтык арылынна.

«Үйэҕэ биирдэ төрөөн ааһар», «Аар тайҕа ырыаһыта», «Айылҕа уһулуччулаах бэлэҕэ» диэн дьоҥҥо-сэргэҕэ үрдүктүк сыаналанар Сэргэй Сибиэрэп — Кыыл Уола өбүгэ уонна билиҥҥи кэм ситимнэһэр, ыһыах ыһыллар кэмин тыыннаабыт үтүөкэннээх киһи. Кини аатын үйэтитэр, аар-саарга аатырдар быйылгы үрүҥ тунах ыһыах өрөспүүбүлүкэ таһымыгар ыытыллар.

Ыһыах ыалдьыттарын ортотугар бырабыыталыстыба эппиэттээх үлэһиттэрэ, Ил Түмэн дьокутааттара, улуус дэлэгээссийэлэрэ бааллар. Алгысчыт кырдьаҕас тоҕус туруйа уолаттарыныын, аҕыс кыталык кыргыттарыныын тиийэн кэлэн, тоҕус мэҥэ халлаан үрүҥ айыыларыттан көрдөһөн-ааттаһан, саха дьолун түстүүр, үөрүүтүн үксэтэр алгыһын анаата.

Алгыһы Михаил Евсеев — Кураһаай Мэхээлэ түһэрдэ. Дьэ, ол кэннэ Ньурбаттан, Дьокуускайтан тиийэ, барыта 30-ча үҥкүү бөлөҕө, 1000 киһи кыттыылаах театрализованнай дьүһүйүү саҕаланна.

Ыһыах арыллыыта, Сэргэй Сибиэрэп дьоҥҥо биллэринэн, 9 оһуордаах дьоҕуругар олоҕурда. Кини кэрэ кылыһахтаах тойуксут, оһуохайдьыт, хомоҕой хоһоонньут, саха үҥкүүтүн айааччы, туруорааччы, олоҥхоһут, төрүт үнүстүрүмүөнү өрө тутааччы, байанайдаах булчут, чабырҕахсыт уонна бөлүһүөк. Бу барыта Добун түһүлгэҕэ арылхайдык көһүннэ.

Арыллыы хаамыытын норуот суруйааччыта Наталья Михалева — Сайа суруйда оттон режиссерунан оҕо ускуустубатын оскуолатын салайааччы Алексей Степанов үлэлээтэ. Өрөспүүбүлүкэтээҕи ыһыахха анаан, оччолорго Москва куоракка тиийэ аатырбыт «Оһуор үҥкүүтүн» төрүт туруоруутугар олоҕуран уларытыылары киллэрдилэр. Ону тэҥэ «Ситим» үҥкүүнү хос сөргүттүлэр, «Хотой» үҥкүүтүн аан бастакытын туруордулар.

Үҥкүүһүттэри кытта Саха сирин култууратын үтүөлээх үлэһитэ, хореограф Ирина Аввакумова үлэлээтэ. Маны тэҥэ, үҥкүү тыйаатырын оркестра «Кыл Саха» бөлөх тыыннаах доҕуһуолунан киэргэттэ. Бу курдук үтүө киһи аата үс үйэ тухары умнуллубат, диэн Сунтаар улууһун дьаһалтатын пресс-сулууспата суруйар.