Сунтаартан 5 км сиргэ турбут баһаар бохсулунна

Сунтаар улууһун Сунтаар сэлиэнньэтиттэн 5 км сиргэ турбут баһаар, бэҕэһээ, ыам ыйын 17 күнүгэр, күнүс Саха сирин судаарыстыбаннай баһаары утары сулууспатынан бохсулунна. Ол туһунан СӨ Суһал ыстааба иһитиннэрэр.

Билиҥҥитэ баһаары умуруоруу салҕанар. Баһаары умуруорууга 5 уоту кытары охсуһааччы, биир тиэхиникэ – дьоҕус ойуур баһаарын комплекса, итиэннэ олохтоох дьаһалта 5 үлэһитэ, икки ойуур хаһаайыстыбатын үлэһитэ кыттар.

Өрөспүүбүлүкэ үрдүнэн, бэҕэһээ, ыам ыйын 17 күнүгэр, 22 ландшафнай баһаар: 9 – Нам, 6 – Мэҥэ Хаҥалас, 4 – Кэбээйи оройуоннарыгар, 3 – Дьокуускай куорат сиригэр умуруорулунна. Бу баһаардар үгүстэрэ арыыларга тахсыбыттара, онон нэһилиэнньэлээх пууннарга кутталы үөскэппэтэхтэрэ.