Сунтаартан ырыа кэһиилээх

Олунньу 16 күнүгэр «Сэргэлээх уоттара» култуура киинигэр «Сунтаартан ырыа кэһиилээх» диэн ааттаах ырыа-үҥкүү дьоро киэһэтэ буолла.

Сунтаар улууһуттан биир дойдулаахтарбыт кэлэн кэнсиэртээн, дойдубут талааннаахтарын астына көрдүбүт. Ол курдук былыр-былыргыттан тойуксуттар, оһуокайдьыттар уутуйан олорбут Дьаархан нэһилиэгин талба талааннаахтара Лариса Иванова- Ырыа Дьаархан, куоракка кэлэн Тырахтарыыс уола диэн аатынан сүрэхтэммит, социальнай ситиминэн ырыатын дуоһуйа истэр ырыаһыппыт Вячеслав Тимофеев, Александр Васильев, Анна Тотонова, «Күндэл» үҥкүү ансаамбыл салайааччыта, Дьаархантан төрүттээх Георгий Семенов, Станислав Архипов-Сылгыһыт Ыстаппаан, Сардаана Трофимова ырыаларын олус сэргээн көрдүбүт. Талааннара сөхтөрдө, куоластара маанытын. Бу кэрэ бырайыагы Дьаархан култууратын директора Василий Васильев толкуйдаан, үөрүүбүтүн күүһүртэ. Дьаархаҥҥа кулууп дьиэтэ эргэрэн, кыһыҥҥы өттүгэр сабыллан турар, ол эрээри култуура үлэтэ тохтообот. Бары тэрээһини тэрийэллэрин таһынан, элбэх бырайыакка кытталлар. Ол курдук Ньурбаҕа испэктээк күрэҕэр кылаан кыайыылаах аатын ылан, аны кулун тутарга саха театрыгар дьаархаттар испэктээк туруоруохтара.

Кэнсиэри биһиги саха дьоно бары киэн туттар суруналыыспыт, олус талааннаах Тускулаана истиҥник сэһэргэһэн ыытта. Аны манна эбэн эттэххэ, өрөспүүбүлүкэҕэ киэҥник биллэр Дархан этээччи, 2024 сылга Оһуокайга Ил Дархан стипендиата Лариса Иванова кэрэ куолаһынан ыллаан, көрөөччүлэри абылаата. Кэнсиэр иннинэ Лариса Николаевна үөрэнээччилэринээн киэҥ Оһуокайы тэрийдэ, түһүлгэлээн эттэ. Талааннаах дьоммут барытыгар талааннаахтар диэн астынныбыт.
Ас-үөл дьаарбаҥката үлэлээтэ.
Онон, талааннаах дьоммутугар дьаархаттарга махталлаах, үтүө кэнсиэртэн астынныбыт. Маны сэргэ, кэнсиэргэ виртуоз-хомусчут Дьүрүйээнэ, Юана, о.д.а. талааннаах ырыаһыттар ыллаан киэргэттилэр.

Марта Николаева