Суол быһылааныгар эчэйбит дьону эмтээһини хонтуруолга тутуллар

СӨ Доруобуйа харыстабылыгар министиэристибэтэ Бүлүүлүүр суолга саахалга түбэһэн эчэйбит дьон туругун туһунан бэҕэһээ киэһэ иһитиннэрдэ.

Атырдьах ыйын 3 күнүгэр  киэһэ 18:26 ч. 2-с №-дээх Өрөспүүбүлүкэтээҕи балыыһаҕа-суһал мэдиссиинэ көмөтүн киинигэр Бүлүүлүүр суолтан саахалга эмсэҕэлээбит икки киһи киирбит.

Нейрохирургическай отделение реанимациятыгар киирбит биир ыарыһах туруга ыарахан, мэйиитигэр ыарахан эчэйиини ылбыт.

Иккис ыарыһах хас да сиринэн сиһин, сүнньүн тоһуппут, туругуа эмиэ ыарахан диэн сыаналанар, эмтэнии хирургическай отделениеҕа ыытыллар.

Үс оҕо суһал көмө массыынатынан Бүлүүлүүр суолтан М.Е. Николаев аатынан Мэдиссиинэ киинин, Педиатриятыгар киирбит. Икки оҕо уопсай туруга ортоһуор диэн сыаналанар. 1 саастаах оҕо туруга ыарахан, реанимация отделениетыгар баар.

Оҕолору салайыыга уонна эмтээһиҥҥэ федеральнай киини кытта теле-мэдиссиинэ консультацията ыытыллыбыт. Бэҕэһээ сөптөөх чинчийиилэр, манипуляциялар ыытыллыбыттар. Ыарыһахтарга барыларыгар үрдүк таһымнаах анал мэдиссиинэ көмөтө, исписэлиистэр консультациялара оҥоһуллар, эмсэҕэлээбит дьон туругун бигэргэтэргэ бары наадалаах көмө көрүллэр диэн  СӨ доруобуйа харыстабылыгар министиэристибэтэ иһитиннэрэр.

Ыарыһахтары эмтээһин «Защита» Бүтүн Арассыыйатааҕы катастрофа мэдиссиинэтин киинин хонтуруолугар тутуллар.