Суол быһылааныгар икки киһи эмсэҕэлээтэ

Эдьигээн оройуонугар суол саахалыгар икки киһи эмсэҕэлээтэ. Бу туһунан Госавтоиниспиэксийэ иһитиннэрдэ.

Ахсынньы 22 күнүгэр  02 ч. 31 мүн. ИДьМ Эдьигээн оройуонунааҕы отделын дьуһуурунай чааһыгар Дьокуускай — Эдьигээн хайысхатыгар кыһыҥҥы суолга массыына түҥнэстибитин, эмсэҕэлээбит дьон баарын туһунан иһитиннэрии киирбит.

Бэрэбиэркэ кэмигэр биллибитэ, ахсынньы 21 күнүгэр 16 ч. саҕана
«Тойота Хайс» массыына суоппара Бааханайга тиийбэккэ, уруулун кыайан туппакка, түҥнэстибит.  Ол түмүгэр икки пассажир, ол иһигэр   17 саастаах  кыыс уонна 1985 с.т. эр киһи эчэйбиттэр.

Массыынаҕа суоппары таһынан 7 пассажир баар эбит. Билигин суол быһылаанынан бэрэбиэркэ ыытыллар.