Суол быһылааныгар сылгытын сүтэрбит биэнсийэлээх дьахтарга хоромньу төлөнүөҕэ

Горнай оройуонунун борокуратууратын ирдэбилинэн, биэнсийэлээх дьахтар сылгытын тырааныспарынан түҥнэри көппүттэринэн материальнай хоромньу төлөнүөҕэ.

Ол курдук, Горнай оройуон борокуратуурата биэнсийэлээх дьахтар көрдөһүүтүнэн бэрэбиэркэ ыыппыт. Силиэстийэ быһаарыытынан, 2022 сыл олунньу ыйыгар «Бүлүү» айан суол трассатын 95 км.+700 м. учаастагар сылгыны түҥнэри көтүүлээх суол быһылаана тахсыбыт. Түмүгэр дьахтар сылгыта суох хаалбыт.

Биэнсийэлээх дьахтар 9 оҕолоох, 35 сиэннээх, 3 хос сиэннээх, «I истиэпэннээх Ийэ килбиэнэ» уордьан хаһаайката буолар. Бу иннинэ кини урут хаста да төгүл материальнай хоромньуну толуйарга сайабалыанньа суруйбут да, туох да көмө оҥоһуллубатах, быһаарыы ылыныллыбатах.

Борокуратуура хоромньу сууматын көрдүүр туһунан дьыаланы суут көрүүтүгэр ыыппыт.
Горнай уууһун суута борокуратуура ирдэбилин ылынан, сайабылыанньалаах дьахтарга 52 тыһ. солк. хоромньуну төлүүргэ быһаарыы ылыммыт. Суут быһаарыыта сокуоннай күүһүгэр киирэ илик. Бу туһунан СӨ Борокуратууратын пресс-сулууспата суруйар.