Суол быһылаанын таһааран баран куоппут

Ааспыт сууккаҕа Дьокуускай  куоракка биэс суол быһылаана таҕыста. Бу туһунан куораттааҕы Госавтоиниспиэксийэ иһитиннэрдэ.

Сэтинньи 10 күнүгэр сарсыарда   6 чаас саҕана   Госавтоиниспиэксийэ дьуһуурунай бөлөҕөр Ленин проспегар суол быһылаана  тахсыбытын туһунан иһитиннэрии киирбит. Ол курдук, 8А  №-дээх дьиэ таһыгар  32 саастаах дьахтар  «Lexus LX470» массыынанан олус түргэнник айаннаан иһэн уруулун кыайан туппакка, сатыы дьон туоруур сирдэринэн күрүөҕэ баран түспүт. Дьолго, суол быһылааныгар ким да эчэйбэтэх.  Дьахтарга  КоАП РФ   12.26 ыст. 1 ч. уонна 12.33 ыст.  административнай матырыйаал толоруллубут.

Аны  07:20 ч. дьуһуурунай бөлөххө  «Бүлүү» федеральнай суол 13 км  массыына түҥнэстибитин туһунан иһитиннэрии киирбит. Ол курдук кимэ биллибэт киһи «Honda Fit»  массыынанан айаннаан иһэн уруулун кыайан туппакка, суолтан тахсан түҥнэстибит. Суол бэлиэлэрин тоҕо көппүт.  Итиэннэ  суоппар саахал тахсыбыт сириттэн куотан хаалбыт. Билигин туһааннаах быһылаанынан бэрэбиэркэ ыыттыллар.