Суол быраабылатын кэһии ыстарааба үрдээри турар

2025 сыл тохсунньу 1 күнүттэн суол быраабылатын кэһии ыстараабын үрдэтэр былааннаахтар диэн “Ведомости” хаһыат иһитиннэрэр.

РФ бырабыыталыстыбата КоАП-ка көннөрүүлэри киллэрэр бырайыагы оҥорбут.

Бырайыак быһыытынан, куру иилиммэтэххинэ ыстарааба 1000-тан 1500 солк. диэри.

Итирик туруктаах массыынаны ыыта сылдьан тутулуннахха – 30000 солкуобайтан 45000 солк. диэри.

Ускуораһы улаатыннардахха уонна суол бэлиэлэрин ирдэбиллэрин тутуспатахха: төһө улаатыннарбыккынан көрөн, 500-5000 солкуобайтан 750-7500 солк. диэри.

Маны таһынан, ыстараабы төһөнөн түргэнник төлүүгүн да, соччонон чэпчэтиллэр кээмэйигэр эмиэ уларыйыы киирбит. Билигин 20 күн иһигэр ыстараап сууматыттан 50 бырыһыаны төлүүллэрин оннугар, тохсунньу 1 күнүттэн суоппардар 30 күн иһигэр 75 бырыһыанын  төлүөхтэрин сөп.

Алтынньыга бэрэсидьиэн Владимир Путин массыына нүөмэрин кистээтэххэ балтараа сыл устатыгар  быраабыҥ былдьанарын туһунан сокуоҥҥа илии баттаабыта.  Билигин маннык кэһии иһин ыстарааба 5 тыһ. солк. эбэтэр 1-3 ыйга быраабыҥ былдьанар.