Суол доҕордоох, айан аргыстаах

Домодедовоҕа баран эрэр экспресс-пуойаһы куоттара сыһан сүүрүүнэн, аҕылаһан-мэҥилэһэн миэстэбитин булан олордубут.

Пуойаспыт хоҥнон түргэтээтэ. Түннүгүнэн Москва куорат элэҥниир. Аттыбар маҥан, кылгас куудара баттахтаах, хачаайы, эйэҕэс сирэйдээх, интэллигиэн көрүҥнээх нуучча эмээхсинэ олорор. Биһиги сахалыы кэпсэтэрбитин сэргээн иһиллиир. Онтон: «Эһиги икки тылынан холкутук кэпсэтэҕит, ханнык омуктаргытый?» — диэн ыйытта. Мин: «Сахаларбыт. Биһиги уһуйаантан, бастакы кылаастан нуучча тылын үөрэтэбит», — диэн хардардым. Аҕам саастаах киһи ханна айаннаан иһэрин токкоолостум.

Ленинград куоракка төрөөбүт эбит. Аҕа дойду сэриитин кэнниттэн кэргэн тахсан, Москваҕа көспүт. Онтон ыла төрөөбүт куоратыгар бара илик үһү. Үлэтин учуутал курдук өйдөөтүм.
Cөмөлүөтүнэн Санкт-Петербурга көтөр үһү. Аарыма саастаах кырдьаҕас хайдах соҕотох айанныырыттан соһуйбуппар: «Көрсөллөр», — диир. Биир улахан соруга сибэтиэй Ксения Петербургская уҥуоҕар сүгүрүйүөхтээх, кини часовнятыгар сылдьыахтаах эбит. «Ксения Петербургская диэн кимий?» — диэн ыйыппытыгар сатаан эппиэттээбэтибит. Онуоха аҕыйах илиистээх кинигэлээҕин аахтара биэрдэ.

Куугуначчы айаннаан иһэбит. Москва куорат кытыытын тыата түннүгүнэн элэҥниир. «Сэрии кэмигэр эн ханна баар этигиний?» диэн ыйытабын. Ону: «Мин Ленинград куоракка саҥа оскуоланы бүтэрбит кыыс этим», — диэтэ. Зенитчиктэр куурустарын элбэх кыыс буолан бүтэрбиттэр. Кэлин, сэрии кэнниттэн үөрэххэ киирбит.
«Брест кириэппэһин көрө сылдьан, зениткэҕэ олорон көрбүтүм. Оччолорго ырыган этим да, нэһиилэ баппытым. Аны төгүрүччү эргийиэххэ уонна зенитканы үөһээ-аллараа хамсатан, эрийэн кулахычытан сыалгын булан ытыаххын наада», -– диэн кэпсээтэ. Эдэркээн кыргыттар, уолаттар аһаҕас халлаан анныгар хайдах сэриилэспиттэрин өйбөр оҥорон көрбүтүм. Дьэ, ыарахан кэм эбит!
«Блокада, төгүрүктээһин кэмигэр төһө хоргуйбуккутуй?» — диэн ыйыппыппар: «Биһиги салааттар буоларбыт быһыытынан, паёк биэрэллэр этэ, онон наһаа аччыктаабатахпыт. Аччыктаабыт оҕолорго аһынаммыт аспытыттан бэрсэр этибит. Үксүн түүн маныырбыт. Буомбалааһын кэнниттэн иккилии буолан, анаммыт дьиэлэрбит кырыыһаларын кэрийэ сылдьан баһаары умулларарбыт , -– диэн кэпсээтэ.
«Сэрии кэмин, бэйэҥ тускунан суруйан хаалларыа эбиккин дии», -– диэбиппэр: «Араас кинигэ баар, онтон ааҕыахтара. Мин суруйбуппун ким сэҥээриэй?!» — диэх курдук эппитэ.
Ол да буоллар, син кэпсиэ эбит да, Домодедово чугаһаата. Рейспитигэр хойутаан эрэрбитин истээт, бу аанынан таҕыстаххытына хойутуоххут, бириэмэни сүүйүҥ, пуойас айанныыр кэмигэр хас да богуону нөҥүөлээн, аэропортка чугас бастакы богуонунан тахсыҥ», — диэн сүбэлээтэ. Биһиги малбытын ылан, махтанан тахсар ааммытыгар бардыбыт.
«Мин эһиги тускутугар сибэтиэй Ксенияҕа үҥүөм, көрдөһүөм», — дии хаалбыта. Чымадааммытын сурулаччы соһон, хас да богуону туораан, ааммытын буллубут. Экспресс тохтообутугар аэропорпут бу турар эбит. Пуойастан тахсаат, аэропорду биир гына кытаанах сүүрүүнү сүүрдүбүт. Кыл тыыммытынан тиийбиппит регистрация субу бүппүт. Онно үлэлиир кыыс букатын кыыһыра тоһуйда киллэримиэн баҕарда. Кырдьаҕас киһи үтүө санаата тиийбитэ дуу, үҥэн көрдөспүтэ тиийбитэ дуу, регистрацияланан сөмөлүөппүтүгэр киирбиппит уонна дойдубут диэки көтөн күпсүйбүппүт.
Аҕа дойду улуу сэриитин бэтэрээнэ, Ленинграды төгүрүктээһин кэмигэр куораты көмүскээччи, зенитчица, сымнаҕас бэйэлээхтик, күп-күөх хараҕынан арылыччы көрбүт нуучча эмээхсинигэр куруук махтана саныыбын.

Анна ДАНИЛОВА