«Суол»: Дьокуускай уулуссаларынан Туймаада хочотун үһүйээннэрин кэпсиэхтэрэ

Дьокуускайга «Суол» диэн ааттаах социальнай-култуурунай бырайыак саҕаланна. Бу бырайыак чэрчитинэн, куорат маршруттарынан аудиогидтары истэргэ аналлаах QR-куодтарынан хааччыллыбыт 15 оптуобус сылдьан саҕалаата.

Пассажирдар Туймаада хочотун үһүйээннэрин босхо билэр уонна тырааныспар суоппардарын кэпсээннэрин истэр кыахтаннылар. Чугaс кэмҥэ оптуобустар ахсааннарын 33-кэ диэри элбэтэр былааннаахтар.

Бырайыак үс сүрүн хайысханан үлэлиир. Бастакыта – «Туймаада хочотун үһүйээннэрэ» диэн аудиогид. Манна хочону баһылааһын уонна Дьокуускай куорат олохтонуутун туһунан 30 кэпсээн киирбит. Иккиһэ – «Дьокуускай суоппардар харахтарынан» диэн суоппардар бэйэлэрин кэпсээннэриттэн турар документальнай сиэрийэ. Үһүс хайысха – уус-уран: оптуобустар салоннарын худуоһунньуктар куорат үһүйээннэрин ойуулаан-дьүһүннээн оҥорбут үлэлэринэн киэргэппиттэр.

Дьокуускай куорат баһылыга Евгений Григорьев бэлиэтээбитинэн, бу бырайыак уопсастыбаннай тырааныспары биир кэлимник саҥардыытынан буолар. Бу үлэ «ВЭБ.РФ» судаарыстыбаннай корпорацияны кытта бииргэ ыытыллар. «2021 сылтан саҕалаан, биһиги Дьокуускай куоракка 124 саҥа оптуобуһу аҕаллыбыт. Дьэ кырдьык, бу «ВЭБ.РФ» судаарыстыбаннай корпорацияны кытта бииргэ үлэлээбэтэхпит буоллар, олус уустук буолуо этэ. Бырайыак икки тылынан – нууччалыы уонна сахалыы таҕыста. Бу бырайыагы саҥардыыга элбэх айар, араас идэлээх дьон көхтөөхтүк кытынна», – диэн Григорьев эттэ. Ону таһынан, мэр бырайыак биир сүрүн соругунан суоппар идэтин үрдүк таһымҥа таһаарыы буоларын бэлиэтээтэ. Кэлэр өттүгэр бырайыагы саҥа оптуобустарга эмиэ киллэрэр былааннаахтар.