Хаартыска: Татьяна Зырянова тиксэриитэ
Эҥсиэли хочотугар норуоттар икки ардыларынааҕы кылаастаах успуорт маастара, ССРС Сэбилэниилээх күүстэрин үс төгүллээх чөмпүйүөнэ, Болгарияҕа, Венгрияҕа, Афганистаҥҥа, Тбилисигэ, Германияҕа ыытыллыбыт норуоттар икки ардыларынааҕы турнирдар кыайыылаахтара Иннокентий Зырянов сырдык кэриэһигэр 27 төгүлүн ыытыллар турнир үрдүк тэрээһиннээхтик буолла.
Өрөспүүбүлүкэ араас улуустарыттан уопсайа 375 оҕо кытынна. Бу дьоро күҥҥэ «Суол хаалларбыт чаҕылхай тустуук» диэн кинигэ биһирэмэ буолла. Иннокентий Зырянов аймах-билэ дьонноро, улахан түһүлгэҕэ алтыспыт доҕотторо кыттыыны ылбыттара тэрээһини ситэрэн-хоторон биэрдэ.
Бочуоттаах ыалдьыттар түһүлгэни киэргэттилэр. ССРС үтүөлээх маастара, «Бочуот Знага» уордьан кавалера, ССРС үс төгүллээх, Европа икки төгүллээх чөмпүйүөнэ В.Н.Гоголев, Нам улууһун ытык киһитэ, СӨ тыа хаһаайыстыбатын үтүөлээх үлэһитэ А.Н.Ядреев, Үөһээ Дьааҥы улууһун Бочуоттаах олохтооҕо, ССРС чөмпүйэнээтин боруонса призера М.В.Ноговицын, ССРС чөмпүйэнээтин биэс төгүллээх чөмпүйүөнэ, Булуҥ улууһун Бочуоттаах олохтооҕо Р.Д.Попов, о.д.а. ааттаах-суоллаах улахан тустууктар кыттыыны ыллылар.
Турнир олус сэргэхтик барда, киирсиилэр сытыы буоллулар. Күрэсчиттэр ох курдук оҥостон, кустук курдук куоһанан кэлбиттэрэ көбүөргэ тута көстөр. Тилэх үктэһиилээх, илин-кэлин тардыалаһыылаах күрэхтэһии түмүгүнэн кыайыылаахтар Иннокентий Зырянов мөссүөннээх мэтээллэри кэттилэр. Харчынан, сыаналаах бириистэринэн наҕараадаланнылар. Биэс чөмпүйүөнү бэлэмнээбит тириэньэр убаһанан наҕараадаланна.
Татьяна Зырянова,
Нам.
Хаартыскалар ааптар тиксэриилэрэ
Саха сиригэр "Мобильнай хирургическай киин" инновационнай бырайыагы олоххо киллэрии салҕанар. Бырайыак Ил Дархан Айсен Николаев…
Аһыырбытыгар сыһыаннаах сиэр-туом туһунан билэҕин, истибитиҥ дуо? Тугу билиэхтээх, тутуһуохтаах эбиппитий? Айыы үөрэҕэ тугу этэрий,…
Эһиги, күндү ааҕааччылар, Саха НКИХ биэриилэригэр “үчүгэй баҕайы” диэн этии сиэри таһынан хойуутук этиллэриттэн кулгааххыт…
Бүлүү улууһугар "Сыа-Бүлүү" тэрилтэҕэ былырыын олунньу ыйга эр киһи эчэйии ылан сиһин тоһуппута. Ити кэнниттэн…
Үксүгэр биһиги тууһу аска амтан биэрэр тума эрэ курдук туттабыт. Ол гынан баран, туус дьиэ хаһаайкатыгар…
Хомунаалынай инфраструктураны саҥардыыга ситиһиилэр баалларын туһунан Айсен Николаев 2025 сылга “Водоканал” аахсыйалаах уопсастыба үлэтин барыллааһын…