Суол оҥоруутугар Уһук Илиҥҥэ бастакы миэстэ

Суол оҥоруутугар Саха сирэ Уһук Илиҥҥэ бастакы миэстэни ылла, дойду көрдөрүүтүгэр 18-с миэстэҕэ таҕыста.

Былырыын “Куттала суох хаачыстыбалаах суоллар” нацбырайыак түмүктэммитэ. 2018-2024 сс. кэм устатыгар 2895 км массыына суола нуормаҕа эппиэттиир буолбут, 100-чэкэ нэһилиэнньэлээх пууҥҥа 250 км уулусса, нэһилиэктэр икки ардыларынааҕы 320 км суол, 55 муоста өрөмүөннэммит.

“Федеральнай суолларынан хаарчаҕа суох айаны хааччыйыыга туһааннаах уорганнары кытта үлэ салҕанар. Суол куһаҕан туругун туоратарга саамай кытаанах хонтуруол баар буолуохтаах. “Халыма”, “Бүлүү”, “Амма”, “Мухтуйа” массыына суолларын көрө-истэ сылдьарга бэдэрээтчиттэргэ ирдэбили үрдэтэр сорудахтары биэрдим”, — диэтэ Ил Дархан Ил Түмэҥҥэ отчуотун кэмигэр.