Суол саахалларыгар үс киһи суорума суолланна

Ааспыт сууккаҕа Саха сиригэр 10 буруйу оҥоруу буолбутун туһунан СӨ Борокуратуурата иһитиннэрэр.

Ленскэй оройуонугар дьиэттэн ювелирнай киэргэллэри уорбуттарын туһунан иһитиннэрбиттэр. Дьокуускай олохтооҕутан түөкүттэр 4 мөл.солк. суйдаабыттар, итиэннэ суотабай сибээс операторабын диэн албыннаан, 150 тыһ.солк. уорбуттара биллибит.

Киин куоракка «Тойота Премио» уонна «Тойота Королла» массыыналары уорбуттар, итиэннэ наркотигынан сокуоннайа суохтук эргиммиттэрэ биллибит. Уус Алдаҥҥа уонна Дьокуускайга итирик туруктаах уруулга олорбут суоппардар иккиһин тутуллубуттар.

Бүлүүгэ 1984 с.т. суоппар «Subaru B9 Tribeca» массыынаны ыытан иһэн сатаан салайбакка түҥнэстибит. Ол түмүгэр 1992 с.т. пассажир тыына быстыбыт.

Хаҥаласка 1986 с.т. суоппар «Лена» федеральнай суолунан «Toyota Land Cruiser 200» массыынаны ыытан иһэн, уҥа көлүөһэтэ моһуоктаан суол утары балаһатыгар тахсан, «Freightliner FLD 120» массыынаны кытта харсыспыт. Суол саахалын түмүгэр «Toyota Land Cruiser 200» суоппара уонна пассажира суорума суолламмыттар.

Суукка устата итирик туруктаах 20 суоппар тутулунна.