Суол саахалыгар түбэспиттэргэ суһал көмө оҥоһуллар

Бөлүүн түүн «Денисовскай» ГОК сиригэр суол-тырааныспар саахала тахсыбытын туһунан суруйбуппут. Бу тэрилтэ үлэһиттэрэ айаннаан испит вахтовай оптуобустара технологическай суолтан суулунна.

Хомойуох иһин, 13 киһи өллө. Өссө 7 киһи Нерюнгри оройуоннааҕы балыыһатыгар киирдэ, олортон иккитэ ыарахан туруктаах. 11 киһи быраастар кэтэбиллэригэр сылдьар.

Саахал тахсыаҕыттан тута суһал уонна ыксаллаах быһыы-майгы  сулууспалара онно үлэлииллэр. Дьокуускайтан Ан-26 санитарнай бортунан мэдиссиинэ биригээдэтэ тиийэн үлэлиир.

Бүгүн сарсыарда СӨ Доруобуйа харыстабылын министиэристибэтэ «Денисовскай ГОК» АУо суол саахалыгар эмсэҕэлээбит дьон туругун туһунан иһитиннэрдэ.

Суол-тырааныспар саахалын түмүгэр эмсэҕэлээбиттэри Нерюнгри киин оройуоннааҕы балыыһатыгар суһаллык киллэрбиттэр. Уопсайа эмсэҕэлээбит 20 киһи балыыһаҕа тиэрдиллибит.

Билиҥҥи туругунан 10 киһи балыыһаҕа киирбит, олортон 2-тэ ыарахан, 8 орто ыарахан туруктаахтарынан сыаналанар. Өссө 9 эмсэҕэлээбит киһи  амбулаторно көрдөрүннэ – кинилэргэ эт-сиин халымыр эчэйиитин диагноһа туруоруллубут. Биир киһи бэрбээкэйин тоһуппут эрээри, суһал эмтэниигэ наадыйбат диэн иһитиннэрэллэр. Биир киһи ыарахан эчэйиини ылан тыына быстыбыт.

Идэтийбит мэдиссиинэ көмөтүн оҥорорго Дьокуускайтан Өрөспүүбүлүкэтээҕи катастрофа мэдиссиинэтин киинин (РЦМК) анестезиолог-реаниматолог, травматолог, хирург, нейрохирург, ону таһынан икки фельдшер састааптаах биригээдэтэ көттө. Эмсэҕэлээбиттэргэ миэстэтигэр суһаллык психологическай көмөнү оҥорорго ЫБММ психолога эмиэ көттө.

СӨ Доруобуйа харыстабылын министиэристибэтэ балаһыанньаны хонтуруолга ылан олорор.

Оттон Ил Дархан Айсен Николаев бэйэтин телеграмм-ханаалыгар Нерюнгри оройуонун баһылыга Роман Щегельняктыын сибээстэһэ олорорун туһунан иһитиннэрдэ. Саахал тахсыбыт төрүөтүн сиһилии быһаарарга, ону таһынан эмсэҕэлээбиттэргэ уонна өлбүттээхтэр дьиэ кэргэттэригэр бары өттүнэн көмөнү оҥорорго сорудахтаабыт. Ил Дархан өлбүттээхтэр чугас дьонноругар, аймахтарыгар дириҥ кутурҕанын биллэрдэ.