Суолаҕа саҥа фельдшерскэй-акушерскай пуун тутулунна

Мэҥэ Хаҥалас улууһун Суола сэлиэнньэтигэр саҥа фельдшерскэй-акушерскай пуун дьиэтин тутуута түмүктэннэ.

Доруобуйа харыстабылын саҥа эбийиэгин иэнэ 75 квадратнай миэтэрэ. Тэрилтэ симиэнэҕэ уон ыарыһаҕы көрүөн сөп. Бу туһунан Доруобуйа харыстабылын министиэристибэтин пресс-сулууспата суруйар. Суола сэлиэнньэтин нэһилиэнньэтин ахсаана 339 киһи, ол иһигэр 17 сааһыгар диэри 122 оҕо.

«Билигин пуун дьиэтин лицензиялааһынын үлэтэ барар. Тэрилтэ мэдиссиинэ үлэһиттэринэн толору хааччыллыылаах уонна аныгы ирдэбилинэн нэһилиэнньэҕэ хаачыстыбалаах мэдиссиинэ көмөтүн оҥоруоҕа. Доруобуйа харыстабылын бастакы звеноларын саҥардыы бырагырааматын көмөтүнэн тыа сирин олохтоохторо хаачыстыбалаах мэдиссиинэ өҥөтүнэн толору туһаныахтара», — диэн Мэҥэ Хаҥалас киин балыыһатын кылаабынай бырааһа Алексей Павлов кэпсээтэ.