Суолу оҥорооччулар байыаннай дьайыы бара турар сиригэр КамАЗтары ыыттылар

«Арктика суоллара» уонна СӨ тырааныспарын уонна суолун хаһаайыстыбатын министиэристибэтэ байыаннай дьайыыга кытта сылдьар байыастарга икки КамАЗ масыынаны биэрдилэр. Бу туһунан Ил Дархан пресс-сулууспата иһитиннэрэр.

Таһаҕаһы тиэйэр массыыналар күлүүстэрин тырааныспар миниистирэ Владимир Сивцев Донбаһы өйүүр уонна көмө оҥорор пуондаҕа туттарда.

«Өрөспүүбүлүкэ тырааныспарын тиһигин тэрилтэлэрэ пуонданы өйүүллэр. Бу икки КамАЗ массыына тиэхиньичэскэй өттүнэн бэрэбиэркэни ааспыттара, үлэлииргэ бэлэмнэр. Массыыналар иккиэн байыаннай дьайыыга кытта сылдьар биһиги байыастарбытыгар тириэрдиллиэхтэрэ», — диэн миниистир эттэ.

Биир кэлим сүрүннүүр киин суһал ыстаабын салайааччыта Георгий Куркутов бэлиэтээбитинэн, массыыналары тимир суолунан ыытыахтара.