Суоппар айаннаан иһэр массыынаттан ыстаммыт

Дьокуускайдааҕы ИДьМ үлэһиттэрэ күһэйэн туран харчы көрдөөһүҥҥэ уорбаланар икки киһини туттулар. Барыллаан дааннайдарынан, бу эрдэ сууттана сылдьыбыт 34 саастаах эр киһи уонна кини 32 саастаах доҕоро Дьокуускай олохтооҕуттан 200 тыһ.солк. ирдээбиттэр. Бу туһунан СӨ ИДьМ пресс-сулууспата суруйар.

Быһаарыллыбытынан, уорбаланааччылар эмсэҕэлээччини түүҥҥү кулууп таһыгар көрсөн, дьиэлэригэр диэри илдьэргэ көрдөспүттэр. Ол айаннаан иһэн эр дьон суоппартан күһэйэн туран харчы көрдөөбүттэр. Айдаарсыы кэмигэр уорбаланааччылартан биирдэстэрэ уруулга олорбут.

Куттаммыт суоппар айаннаан иһэр массыынаттан ыстанан кэбиспит уонна куоппут. Оттон уорбаланааччылар массыынаны Лермонтов уулуссатыгар хаалларан баран саспыттар.

Күһэйэн туран харчы көрдөөбүт дьоҥҥо холуобунай дьыала тэрилиннэ.