Суоппар дастабырыанньатын быраабын тохтотуу судургутуйар

Быраастар мэдиссиинэ көрүүтүн эбэтэр диспансеризация кэмигэр суоппарга тимир көлөнү салайыыга бобор-хаайар ыарыыны буллахтарына, ГАИ  иниспиэктэрэ дастабырыанньа быраабын тохтотор кыахтаныа.

Маннык сокуону Госдуума бэс ыйын 24 күнүнээҕи пленарнай мунньаҕар иккис уонна үһүс ааҕыыга ылынна.

Билигин суоппардар доруобуйаларын 10 сылга биирдэ мэдиссиинэ хамыыһыйатын ааһан, сөптөөх ыспыраапканы ылар кэмнэригэр бэрэбиэркэлииллэр. Полиция үлэһиттэрэ бу кэм иһигэр тимир көлө бас билээччитэ саҥа ыарыыларынан ыалдьыан сөп диэн сабаҕалыыллар. Оччотугар суоппар дастабырыанньатын быраабын тохтотуу судургутуйуоҕа.

Ылыныллыбыт нуормаларынан, өскөтүн суоппарга диспансеризация эбэтэр бырааска сылдьыы кэмигэр массыына ыытарга доруобуйатынан утарар көрдөрүүлэри буллахтарына, кинини болдьоҕо суох бэрэбиэркэҕэ ыытыахтара. Суоппар диагноһа бигэргэннэҕинэ, сибидиэнньэлэри Доруобуйа харыстабылын министиэристибэтин баазатыгар киллэриэхтэрэ уонна ГАИ сулууспатыгар автоматическайдык тиэрдиэхтэрэ. Дириҥэтиллибит диспансеризацияны ааһарга үс ый бэриллиэҕэ. Итиэннэ киһиэхэ мэдиссиинэ өҥөлөрө босхо оҥоһуллуохтара. Бу туһунан «Парламентская газета» суруйар.

Өскөтүн суоппар бэрэбиэркэҕэ барбатаҕына эбэтэр киниэхэ доруобуйатынан утарар көрдөрүүлэрэ бигэргэннэҕинэ, дастабырыанньата автоматическайдык сотуллуоҕа. Ону чөлүгэр түһэрии доруобуйатын бигэргэтэр саҥа мэдиссиинэ түмүгүнэн эрэ кыаллыаҕа.

Ону таһынан, мэдиссиинэ ыспыраапката электроннай көрүҥҥэ көһөрүллүөҕэ. Онон суоппардар дастабырыанньа ылалларыгар мэдиссиинэ ыспыраапкатын көрдөрөр наадалара суох буолуоҕа. Сокуон 2027 сыл кулун тутар 1 күнүттэн күүһүгэр киириэҕэ.