Суоппар массыынанан икки сылгыны түҥнэри көтөн эчэйдэ

Быһылаан атырдьах ыйын 3 күнүгэр түүн икки чаас саҕана «Умнас» эрэгийиэннээҕи суол 54-с км учаастагар тахсыбыт.

Барыллаан быһаарыынан, Дьокуускайтан Покровскайга айаннаан иһэн, УАЗ-22069 массыына суоппара сылгылары түҥнэри көппүт. Саахал түмүгэр суоппары Хаҥалас улууһун балыыһатыгар киллэрбиттэр, оттон икки сылгы миэстэтигэр өлбүт.

Быһылаан буолар кэмигэр суоппар икки пассажирдаах айаннаан испит, курунан баанан олорбут уонна арыгы испэтэх. Пассажирдар эчэйбэтэхтэр. Суол быһылаана түүн аспаал, кураанах көнө суолга тахсыбыт. Быһылаан кыттыылаахтара быһааралларынан, сылгылар суол ортотугар соһуччу тахсан биэрбиттэр.

Суол быһылаанын төрүөтүн быһаараллар, диэн Госавтоинспекция пресс-сулууспата иһитиннэрэр.