Суоппардар болҕойуҥ! «Фотовидеофиксация» саҥа тиһигэ үлэлээтэ

Суол быраабылатын кэспит суоппарга  боротокуол оҥоһуллуоҕа. Маннык дьаһал наадалааҕын Госавтоинспекция исписэлиистэрэ саарбахтаабаттар.

Холобур, күнүскү өттүгэр массыынаҕа фара уотун холбоон сылдьар суол быраабылатын тутуһууну үрдэтэр дииллэр.

Ити курдук, өрөспүүбүлүкэ куораттарынан уонна оройуоннарынан суол быраабылатын кэһиини хонтуруоллуурга «фотовидеофиксация» саҥа тиһигэ үлэҕэ киирдэ. Онон билигин суол камераларынан видеоҕа уһулан уонна хаартыскаҕа түһэрэн суол быраабылатын кэһиитин хонтуруолга ыллылар:

• суоппардар уонна пассажирдар курунан баанан олорууларын;
• уруулга олорон суотабай төлөпүөнү туһаныыларын;
• күнүскү уонна түүҥҥү өттүгэр фара уота суох айанныылларын.

Суол быраабылатын кэһии туһунан хаартыскалар, ону кытта видеолар автоматическайдык ГИБДД сулууспатын ЦАФАП киинигэр ыытыллаллар.  Саҥа тиһиккэ сыыһа-халтыны аҕыйатар сыалтан суол быраабылатын кэһээччини хас да уонунан хаартыскаҕа түһэрэллэр. Салгыы дьыаланы административнай сокуонун бэрээдэгинэн иниспиэктэрдэр быһаараллар. Хас биирдии хаартысканы үөрэтэн баран, ыстараапка боротокуол суруйаллар.

Саҥа тиһиги үлэлии турар камераларынан холбоотулар. Маннык дьаһалы сорох суоппардар өйөөтүлэр, атыттар эбии ыстараап хомуйарга тиһик холбоммут диэн санааларын кытта үллэһиннилэр.