Суоппардарга судаарыстыбаннай түһээн кээмэйэ үрдүөҕэ

Дойду Бэрэсидьиэнэ Владимир Путин бу сыл  балаҕан ыйын 1 күнүттэн тимир көлөлөөхтөргө анаан сорох судаарыстыбаннай түһээннэри үрдэтэр уонна саҥалары киллэрэр туһунан сокуоҥҥа илии баттаата. Докумуон быраап иһитиннэриитин официальнай интэриниэт-портаалыгар таҕыста.

Суоппар дастабырыанньатын биэрии иһин түһээннэр икки төгүл улааталлар, диэн ТАСС иһитиннэрэр. Бу түһэннэр 2014 сыллаахха (саҥа көлүөнэ дастабырыанньаларыгар – 2018 сыллаахха) олохтоммуттара уонна ол кэмтэн ыла уларыйа иликтэрэ.

Билигин түһээннэр маннык буолуохтара:

• Саҥа  дастабырыанньаҕа – 6 тыһ. солк., эргэҕэ – 4 тыһ. солк., аан дойдутааҕыга – 3,2 тыһ. солк.. Дастабырыанньаны 10 сылга биирдэ уларытыахха наада, онон этиллэр суума улахан ыараханы үөскэтиэ суоҕа диэн эспиэрдэр быһаараллар.
• Массыына судаарыстыбаннай нүөмэрин биэрии иһин түһээн 2 тыһ. солкуобайтан 3 тыһ. солк. диэри үрдүүр.
• Тырааныспар сириэстибэтин (ТС) регистрациятын туоһу кумааҕыга – 1,5 тыһ. солк. (урут 500 солк. этэ), пластиковай көрүҥҥэ – 4,5 тыһ. солк. (урут 1,5 тыһ. солк. этэ) төлүөххэ наада буолуоҕа.
• Тырааныспар сириэстибэтин пааспарын (ПТС) ылыы сыаната 800 солкуобайтан 1,2 тыһ. солк. диэри улаатыаҕа.
• Тырааныспар сириэстибэлэрин судаарыстыбаннай реестириттэн быыппыысканы биэриигэ судаарыстыбаннай  түһээн киллэриллэр. Биир сайаапка иһин 50 солк. буолуоҕа. Урут бу босхо этэ, онон массыына атыылаһааччылар эрэ буолбакка, дилердэр, атыылаһан-атыылыыр дьон, дааннайдары хомуйар судаарыстыбаннайа суох сервистэр киэҥник туһаналлара. Ол түмүгэр ИДьМ сулууспатыгар аһаа элбэх, үксүгэр биир массыынаҕа хас да төгүл, сайаапка киирэрэ. Сылыгар 1,8 млрд-тан тахса сайаапка. Бу ИДьМ сулууспатын IT-инфраструктуратыгар аһары улахан ноҕуруусканы үөскэтэрэ.
• Тырааныспар тэхиниичэскэй көрүүтүн (ТО) ааспытын бигэргэтэр диагностическай каарталары оҥорууга саҥа түһээн олохтонор. Бу  ИДьМ сулууспатын IT-инфраструктуратын көмөтүнэн ыытыллар. Урут бу өҥө босхо буолан, министиэристибэ ороскуота толуйуллубат этэ. Тэхиниичэскэй көрүү оператордара сыыһа уонна сөп түбэспэт дааннайдары киллэрэр түбэлтэлэрэ эмиэ элбэхтик бэлиэтэнэрэ.
• Авто-оскуола үөрэтэр-матырыйаалынай баазата ирдэбиллэргэ эппиэттиирин туһунан түмүгү биэриигэ судаарыстыбаннай  түһээн баар буолла. Бу, биир өттүнэн, авто-оскуолалары ордук эппиэтинэстээхтик үлэлииллэригэр көҕүлүөхтээх, ол аата суолга хамсааһын куттала суох буолуутун үрдэтиэхтээх. Атын өттүнэн — судаарыстыба ороскуотун сабыахтаах. Авто-оскуолалар урбаанынан дьарыктаналларын уонна саҥа үөрэнээччилэри мэлдьи ылалларын учуоттаан, 15 тыһ. солк. түһээн киирэр.