Суор Уола Москваҕа кэлбитин туһунан сурах кырдьык дуо?

Суруйааччы Валерий Никифоров-Суор Уола иккис төгүлүн байыаннай эпэрээссийэҕэ кытта барбытыгар эрэллээх ааҕааччылара, доҕотторо, чугас дьонноро бары долгуйа атаарбыттара.

Киэҥ араҥаҕа биллэр киһи буолан, кини хайдах сылдьарын интэриэһиргээччи да элбэх. «Суох буолбут»,  «бааһырбыт» уо.д.а. хобдох сурахтар бааллара. Билигин Москваҕа кэлбит сураҕын истээт, бэйэтигэр сибээскэ тахса сырыттыбыт.

Үс ый Луганскайга Тарасовка туһаайыытынан этэҥҥэ сылдьыбытын, аны дойдутуттан арахсар санаата суоҕун туһунан эттэ. Ону таһынан, бу сырыытыгар  инники кирбиигэ буолбакка, үксүгэр асчытынан, кыра үлэлэргэ сылдьыбытын туһунан кэпсээтэ.

Валерий өйүүн, ахсынньы 23 күнүгэр, дойдутугар кэлэр билиэттээх сылдьарын, дойдутун, чугас дьонун ахтан иһэрин туһунан эттэ.