Суордаахха болҕомтолорун уураллар

Бэҕэһээ өрөспүүбүлүкэ Ил Дархана Айсен Николаев быһа эпиирэ буолбута. Онно халааҥҥа  бэлэмнэниигэ эмиэ санаатын эппитэ.

— Дьааҥы улууһун Суордаах нэһилиэгэр былырыын уу содулуттан эмсэҕэлээбитэ. Онон болҕомтоҕо тутабыт. Былырыыҥҥы халаан  түмүгэр биэрэк 30-50 м тиийэ быстан, дьиэлэргэ чугаһаабыта. Былырыын 8 ыал көһүүгэ харчы ылбыта. Уопсайа 21 мөл. солк. көрүллүбүтэ. Быйылгы иккис түһүмэххэ 14 дьиэ баар. Онно 33 мөл. солк. биэрэргэ былаанныыллар, — диэтэ Суордаах баһылыга Владимир Стручков.
Аҕыйах хонуктааҕыта «Саха Өрөспүүбүлүкэтигэр халаан уутун содулларын туоратыыга, чөлүгэр түһэрэр үлэни тэрийиигэ ситэриилээх дириэксийэ» дириэктэрин солбуйааччы Виталий Петров, улуус баһылыгын солбуйааччы Сергей Котельников кэлэн балаһыанньаны билсэн бардылар.