“Суотту суола” хамаанда Бүтүн Арассыыйаҕа ситиһиилэннэ
![](https://sakha-sire.ru/wp-content/uploads/2023/05/8-900x596.jpeg)
Бу күннэргэ Ульяновскай уобаласка VI төгүлүн “Черук” эрэгийиэннэр икки ардыларынааҕы учууталлар хамаандаларын чөмпүйэнээтэ түмүктэннэ. Манна Саха сирин аатын Бүтүн Арассыыйатааҕы куонкуруска Уус Алдан улууһун Суотту оскуолатын “Суотту суола” хамаандата ситиһиилээхтик көмүскээтэ.
“Черук” чөмпүйэнээккэ, үгэс быһыытынан, өрөспүүбүлүкэтээҕи учууталлар мэтэдиичэскэй турнирдарын кыайыылааҕа кыттар. Чөмпүйэнээт икки сылга биирдэ ыытылларынан сибээстээн, былырыын бастаабыт Суотту оскуолатын “Суотту суола” уонна быйылгы кыайыылаах Нерюнгри ПрофSkills хамаандалара кытыннылар. Быйылгы тэрээһин Арассыыйаҕа Педагог уонна уһуйааччы сылын иитинэн барда, онон ордук бэлиэ, суолталаах, таһымнаах. Арассыыйа 15 эрэгийиэниттэн барыта 20 хамаанда күөн көрүстэ.
Суотту хамаандата Ульяновскайтан бэҕэһээ көтөн кэллэ. Оскуола дириэктэрин Ирина Петухованы кытта төлөпүөнүнэн сибээстэһэ сырыттыбыт.
— Саха сириттэн икки хамаанда кытынна. Хамаандалар түөртүү киһилээхтэр. Биһиги хамаандабытыгар нуучча тылын, литэрэтиирэтин учуутала Ирина Черкашина, аангылыйа тылын учуутала Кристина Егорова, физика учуутала Саина Романова, робототехникаҕа эбии үөрэхтээһин педагога Николай Котоконов киирбиттэрэ. Ону тэҥэ, дириэктэри билимҥэ, инновационнай үлэҕэ солбуйааччы Варвара Бурнашева, мин уһуйааччы быһыытынан сүбэбитин, толкуйбутун холбоон кытынныбыт.
“Черук” (Чемпионат региональных учительских команд) чөмпүйэнээт түөрт түһүмэҕинэн барар: “Бэйэҥ тускунан кэпсээ” хамаандалары билиһиннэрии (визитка), “Кылааһы кытта чаас” (кылаас чааһа эбэтэр үөрэҕи таһынан дьарык), “Үөрэх бырайыага”, “Педагогическай СТиЭМ (совместное творчество и эффективные методики)” маастар-кылаас.
Үөрэх үлэһиттэригэр идэлэринэн ыытыллар куонкурустартан букатын атын ирдэбиллээх. Бастатан туран, хамаанданан үлэ буолан хас биирдии кыттааччы өйүн-санаатын барытын түмэн, сөптөөх быһаарыыны тобулан таһаараллар. Иккиһинэн, сорох хамаандалар хаһыс да төгүлүн кытталлар эбит. Холобур, Краснодар “Хаачыстыба бэлиэтэ” хамаандата быйыл төрдүс төгүлүн кэлбит уонна муҥутуур кыайыылааҕынан дьэ ааттанна. Тиһигин быспакка кыттан, уопутуран, үрдүк көрдөрүүгэ тахсаллар эбит, таһымнаахтара чахчы биллэр.
Чөмпүйэнээккэ бастакытын кыттар хамаанда кыайара саарбах диэн хастыыта да кыттыбыт хамаандалар этэллэр. Эспиэртэр эмиэ хамаандаҕытын ыһымаҥ, салгыы үлэлэһиэххитин наада, чахчы кыахтаах, өссө сайыннаран түмүк туһугар үлэлэһиҥ диэн бэлиэтииллэр, — диэн Ирина Михайловна санаатын үллэстэр.
“Суотту суола” хамаанда «Идэлэригэр үрдүк сатабылларын, төрүт үгэстэригэр бэриниилэрин иһин» дьупулуомунан наҕараадаланна, “Педагогическай СТиЭМ” маастар-кылаас түһүмэххэ үһүс миэстэни ылары ситистэ. Онтон уопсай түмүккэ “РосАтом” судаарыстыбаннай корпорация эспэртиисэтин быһаарыытынан, “Түөрт бастыҥ хамаанда” кэккэтигэр киирдэ уонна салгыы бу сыл бэс ыйыгар Екатеринбург куоракка ыытыллар AtomSkills профессиональнай маастарыстыба чөмпүйэнээтигэр кыттарга путевканы тутта.
“Бары түһүмэх тургутууларын бэркэ ааһан, эрэгийиэммитин дьоһуннаахтык көмүскээтибит дии саныыбыт. Бу курдук үрдүк таһымнаах тэрээһиҥҥэ кыттыыбытын оскуолабыт улахан ситиһиитинэн ааҕабыт. Биһиэхэ тугунан да кэмнэммэт уопуту, саҥа идиэйэлэри, умнуллубат өйдөбүлү, дойду араас эрэгийиэннэриттэн мустубут биир идэлээхтэрбитин кытта алтыһыыны бэлэхтээн, чахчы чаҕылхай тэрээһининэн буолла.
Түгэнинэн туһанан, биһигини бэлэмнээбит СӨ Үөрэҕи сайыннарар уонна идэ таһымын үрдэтэр институт үлэһиттэригэр, чуолаан, уһуйааччыларбытыгар, дириэктэри бастакы солбуйааччы Николай Иннокентьевич Бугаевка, нуучча уонна төрөөбүт тыллар кафедраларын мэтэдииһигэр Варвара Васильевна Аммосоваҕа махталбытын тириэрдэбит”, — диэн этэр.
![](https://sakha-sire.ru/wp-content/uploads/2023/05/1.jpeg)
![](https://sakha-sire.ru/wp-content/uploads/2023/05/2-2.jpeg)
![](https://sakha-sire.ru/wp-content/uploads/2023/05/3.jpeg)
![](https://sakha-sire.ru/wp-content/uploads/2023/05/4.jpeg)
![](https://sakha-sire.ru/wp-content/uploads/2023/05/5.jpeg)
![](https://sakha-sire.ru/wp-content/uploads/2023/05/6.jpeg)
![](https://sakha-sire.ru/wp-content/uploads/2023/05/7.jpeg)
![](https://sakha-sire.ru/wp-content/uploads/2023/05/8.jpeg)
![](https://sakha-sire.ru/wp-content/uploads/2023/05/9.jpeg)
![](https://sakha-sire.ru/wp-content/uploads/2023/05/10.jpeg)
![](https://sakha-sire.ru/wp-content/uploads/2023/05/11.jpeg)
![](https://sakha-sire.ru/wp-content/uploads/2023/05/13.jpeg)
Сообщить об опечатке
Текст, который будет отправлен нашим редакторам: