Мичил Пухов хаартыскаҕа түһэриитэ
Уус Алдан улууһугар Суоттуга бильярдка күрэхтэстилэр.
Хоноҕордооҕу «Түһүлгэ» сынньалаҥ киинигэр СӨ култууратын туйгуна, өр сылларга култуура эйгэтигэр таһаарыылаахтык үлэлээбит дэгиттэр талааннаах, ураты дьоҕуурдаах спортсмен, булчут, баянист, ырыаһыт Данил Константинович Кычкин төрөөбүтэ 80 сылыгар анаан эр дьоҥҥо бастыыр иһин улуус таһымнаах күрэхтэһии бэрт сэргэхтик ыытылынна.
Бу күн сарсыардаттан улуус нэһилиэктэриттэн уопсайа 52 киһи сырдык, киэҥ, сылаас кулуупка муһунна. Кэлбит ыалдьыттары, күрэхтэһээччилэри сахалыы сиэринэн арчылаатылар. Күрэхтэһиини тэрийээччи, көҕүлээччи нэһилиэк баһылыга Василий Иннокентьевич Иванов эҕэрдэлээн туран, сүрүн судьуйанан ананан, иилээн-саҕалаан ыытта. Улахан оонньууга тэҥинэн үс бильярд остуола туруоруллубутуттан спортсменнар үөрдүлэр, өрө көтөҕүллэн туран бастыыр иһин биир тэҥинэн илин-кэлин түһүстүлэр.
Күөн күрэскэ ким -кими кытта киирсэрэ тута улахан экраҥҥа көстө турара күрэхтэһии таһымын үрдэттэ. Итиэннэ кэнники бильярд күүскэ сайдыбытын көрдөрөр. Тыҥааһыннаах киирсиилэр түмүктэринэн финальнай оонньууга үһүс бириистээх миэстэни Майаҕастан кэлэн кыттыбыт А.Д.Скороходкин, иккис бириистээх миэстэни Бороҕон спортсмена М.М.Макеев уонна күрэс муҥутуур кыайыылааҕынан Бороҕон спортсмена А.Н.Турантаев сатабыллаах оонньууну көрдөрөн кыайыылаах үрдүк аатын ылыан ылла.
Үөрүүлээх быһыыга-майгыга Данил Константинович Кычкин төрөппүт оҕолоро, кэргэнэ, үлэ бэтэрээнэ Федора Ивановна анаан туруорбут сүрүн бириистэрин — сыаналаах тэлэбиисэри дохсун ытыс тыаһынан туттардылар. Маны сэргэ үчүгэй оонньууну көрдөрбүт кыттааччыларга анал ааттары, бириистэри туттардылар.Бильярды кэрэхсээн оонньуур соҕотох кэрэ аҥаарга, Кэптэниттэн сылдьар А.Д.Татариноваҕа анал бирииһи туттардылар.
Эдэр ыччаттарбыт көхтөөхтүк кытыннылар, киэҥ биһирэбили ыллылар. Күрэхтэһии кыттыылаахтарыгар
анаан Д.К.Кычкин туһунан быыстапка туруорулунна, олоҕун-үлэтин кэпсиир слайда көрдөрүлүннэ. Күөн күрэс былаһын тухары итии, минньигэс астаах буфет тиһигин быспакка үлэлээтэ.
Нэһилиэкпит тэрилтэлэрэ, урбаанньыттара дьоһун бириистэри туруоран, күрэхтэһиини сытыырхаттылар. Кэлбит дьон дуоһуйа оонньоон, атын дьону көрөн, үөрэнэн, сүрдээҕин үөрэн, махтанан бардылар. Элбэх киһи бу көрүҥҥэ кыттыбыта, анаан дьарыгырар оонньооччулар нэһилиэктэргэ сэҥээриини ылаллара, успуорт бу көрүҥэ күүһүрэн иһэрин көрдөрөр.
Үтүөнү үксэтэ, кэрэни кэрэхсии биир санаанан кэлбиккитигэр,бары кыттааччыларга, онньооччуларга, тэрийээччилэргэ ис сүрэхтэн истиҥ махталбытын тиэрдэбит!
Валентина Бубякина
Суотту, Уус Алдан.
Мичил Пухов хаартыскаларга түһэриитэ
Баһылайаптар оҕолоро улаатан, бары киэҥ сиринэн тэлэһийэн, дойдуларыгар да кэлбэт-барбат буоллулар. Икки этээстээх дьиэлэрэ, бэл,…
Бүгүн Саха сиригэр Ийэ күнэ. Орто дойдуга кыыс оҕо буолан айыллан кэлэн, кэргэн тахсан уоллаах…
Тыа сиригэр кэлиҥҥи сылларга араас социальнай суолталаах тутууну тэҥэ устуоруйаны үйэтитэр араас пааматынньыктар, искибиэрдэр тутуллаллар.…
Светлана Свинобоева – элбэх оҕолоох ийэ, бэйэ дьыалатын сайыннарар урбаанньыт. Кини аныгы үйэ дьахталларыттан уратыта…
Дьокуускай, Нерюнгри уонна Мииринэй куораттарга хантараагынан байыаннай сулууспаҕа гражданнары сүүмэрдиир пууннар РФ Оборуона министиэристибэтин кытта…
Саха сиригэр Ийэ күнүн көрсө Кэбээйи улууһун Куокуй нэһилиэгин "Угуйаан" култуура киинигэр күн күбэй ийэлэрбитигэр,…