Суоттуга үлэһит үөрэнээччилэри чиэстээтилэр

Суотту агрооскуолата элбэх көлүөнэ үөрэнээччилэрин өбүгэ үйэлээх үгэстэригэр, үлэ сатабылларыгар иитэр-үөрэтэр уопута өрөспүүбүлүкэ тас өттүгэр тиийэ биллэр.

Оҕолор сүөһүнү-сылгыны көрүүгэ-харайыыга, от үлэтигэр, оҕуруот аһын үүннэриигэ, хомуйууга, тыа сирин үлэтин бары хайысхаларыгар хаьаайыстыбаларга көмө буолан сайыннарын туһалаахтык атаараллар.

Сэтинньи 22 күнүгэр оскуолаҕа үтүө үгэс быһыытынан үлэҕэ үрдүк көрдөрүүлээх оҕолору бэлиэтиир «Үлэ киһини киэргэтэр» тэрээһин, «Дьиэ кэргэн — байылыат олох төрдө» оҕолор уонна төрөппүттэр ас-үөл быыстапкалара кэрэхсэбиллээхтик  ыытылынна.

Оҕо үлэтин үтүө түмүктэрин бэлиэтиир үөрүүлээх күҥҥэ «Туйма», «Чагда» түөлбэлэри сайыҥҥы уунан хааччыйар үлэҕэ көмөтүн иһин Татаринов Герман (10 кылаас), Улуу Кыайыы 80 сылын көрсө «Батас» пааматынньык саҥардыллан оҥоруутугар көмөтүн иһин Донской Валентин (8 кылаас), Москва к. ыытыллыбыт «Көмүс күһүн» агробыыстапка кыттыылааҕа Попова Алена (10 кылаас) нэһилиэк дьаһалтатын Бочуотунай Грамотатынан наҕараадаланнылар.

Сайыҥҥы лааҕырдарга, араас үлэ көрүҥнэригэр бастыҥнары оскуола салалтата бэлиэтээтэ: «Азия оҕолоро» VIII норуоттар икки ардыларынааҕы успуорт күрэҕин волонтердара 11 кылаас үөрэнээччилэрэ Егорова Эмма, Ноговицына Виолетта, Макаров Валентин, Черкашин Кэскил Махтал суруктары туттулар.

«Эрчимэн» лааҕырга хаппыыста олордуутугар туйгун үлэлээх Бурцев Ваня (6 кыл.), Шелковников Алгыс (7кыл.), Музофаров Хасан (9 кыл.), «Кэскил» лааҕырга туйгун үлэлээх Герасимова Диана (4 кыл.), Черкашина Уруйдаана (5 кыл.), Жиркова Айыына (6 «а» кыл.), «Сайылык оҕолоро» лааҕырга сүөһү көрүүтүгэр туйгун үлэлээх Охлопкова Алина (9 «б» кыл.) оскуола салалтатын Махтал суруктарын туттулар.

Нэһилиэккэ ыытыллар волонтерскай хамсааһын көхтөөх кыттааччылара 10 кылаас үөрэнээччилэрэ Голиков Ваня, Сергеев Андрей, оскуола уопсастыбаннай олоҕун бастыҥа Ноговицын Айтал (9 «а» кыл), Варламовтар сүөһү көрүүтүгэр улахан хаһаайыстыбаларын тутаах көмөлөһөөччүтэ Варламов Саша (5 кыл.), «Лена» ТХПК отчуттар биригээдэлэрин көмөлөһөөччүтэ Черкашин Степан (5 кыл.), оскуола үлэҕэ практикатын бастыҥнара Протопопов Арылхан (8 кыл.), Аммосов Айаал (10 кыл.), нэһилиэк уопсастыбаннай олоҕун көхтөөх кыттааччыта Алексеева Инна (8 кыл) Махтал суруктарынан бэлиэтэннилэр.

«Үлэҕэ бастыҥтан бастыҥ» анал ааттары Попова Аленаҕа (10 кыл.), Донской Валентиҥҥа (8 кыл.), Ноговицына Виолеттаҕа (11 кыл.), Баишев Айаалга (9 “а” кыл.), Бурцев Аяҥҥа (8 кыл.), Петров Сандалга (10 кыл.), Сокольников Айсеҥҥа (9 «б» кыл.), Прудецкай Ярославка (7 кыл.) оскуола директора Петухова И.М. туттарда.

Сайыҥҥы лааҕырдар үлэлэрин көрдөрөр видеоклип, талааннаах оҕолор толорууларыгар музыкальнай нүөмэрдэр үлэ үөрүүлээх түмүктэрин көрдөрөр, биллэрэр тэрээһини ситэрэн-хоторон биэрдилэр.

Раиса Черкашина.