Суоттулар субуотунньуктаатылар

Өлүөнэ эбэ мууһа ааспытын кэнниттэн, Суоттуга сыллата санитарнай ырааһырдыы ыйа тэрээһиннээхтик ыытыллар.

Нэһилиэкпит иһин, таһын хомуйар сыаллаах ырааһырдыы субуотунньуктарыгар тэрилтэлэр, түөлбэлэр көхтөөхтүк кытыннылар.

Ол курдук, Суотту орто оскуолатын учууталлара уонна үөрэнээччилэрэ нэһилиэкпит биир кэрэ бэлиэ сирин — ыһыахтыыр сирбитин «Налыыны» ыраастаатылар. Уус Алданнааҕы техникум кэлэктиибэ, «Доҕордоһуу» музейа, ДУоКХ тэрилтэтэ,  олохтоох дьаһалта, култуура тэрилтэтин үлэһиттэрэ, Хоноҕор сүрүн оскуолата, баһаарынай чаас кэлэктиибэ,  оҕо уһуйааннара анаммыт учаастактарыгар хомуйар, ыраастыыр үлэни Суотту — Бороҕон, Суотту — Арыы Тиит трассаларын кытыытынан, нэһилиэкпит кэрэ-бэлиэ миэстэлэринэн, уулуссаларынан ыытан, сирбит-уоппут сайыны көрсө ырааһырда.

Раиса Черкашина,

Суотту, Уус Алдан

Хаартыскалар: Раиса Черкашина тиксэриилэрэ